АҚШнинг The Heritage Foundation ташкилоти томонидан юритиладиган иқтисодий эркинлик индексининг 2021 йилги ҳисоботида Ўзбекистон 178 та ўриндан 108-ўринни эгаллади. Бу 2020 йилги кўрсаткичдан 6 поғона юқори, 2019 йилда эса мамлакат 140-ўринда бўлган.
Иқтисодий эркинлик индекси тўртта асосий йўналиш бўйича 12 та таркибий кўрсаткичдан ташкил топган бўлиб, мулкчилик ҳуқуқи, суд фаолияти самарадорлиги, давлатнинг яхлитлиги, солиқ юки, давлат харажатлари, фискал саломатлик, бизнес эркинлиги, меҳнат бозори эркинлиги, монетар эркинлик, савдо эркинлиги, инвестициялар эркинлиги ва молиявий эркинлик каби соҳаларда жаҳон мамлакатларини 0 дан (энг паст) 100 гача (энг юқори) бўлган шкалада баҳолайди.
Қайд этилишича, Ўзбекистонда иқтисодий эркинлик даражаси 2020 йилда 100 баллдан 58,3 баллни ташкил этди. Умумий кўрсаткичи биринчи навбатда суд тизими самарадорлигининг ошиши ҳисобига 1,1 баллга кўтарилган.
Бу даврда Ўзбекистон иқтисодиёти асосан эркин бўлмаганлигича қолган. Аммо 2020 йилда ҳукумат давлат институтларини ислоҳ қилиш, қонун устуворлигини таъминлаш, суд тизимини ислоҳ қилиш, банк ва молия соҳаларини мустаҳкамлашни ўз ичига олган янги ривожланиш стратегиясини эълон қилди. Унда, шунингдек давлатнинг иқтисодиётга таъсирини камайтириш, инвестицияларни жалб қилиш учун мулк ҳуқуқларини таъминлаш каби бошқа яхшиланишлар ҳам ўрин олган. «Агар бу муваффақиятли бўлса, бир кун келиб Ўзбекистон ўрта даражада эркин бўлганлар қаторидан ўрин олиши мумкин».
Марказий Осиё мамлакатларидан Қозоғистон 34-ўринни, Қирғизистон 78-ўринни, Тожикистон 134-ўринни, Туркманистон эса 167-ўринни эгаллаган. Мазкур рейтингдаги биринчи учликдан Сингапур, Янги Зеландия, Австрия ўрин олди.
Маълумот учун, The Heritage Foundation иқтисодий таҳлил маркази томонидан 180 та давлатнинг Иқтисодий эркинлик индекси 1995 йилдан буён юритиб келинади.
Изоҳ (0)