Moliya vaziri o‘rinbosari Abdumuxtor Ergashev boshqa ishga o‘tganligi munosabati lavozimidan ozod etildi, deb xabar bermoqda “Gazeta.uz”.
U ushbu lavozimni 2019-yilning sentabridan buyon egallab kelgan va agrosanoat majmuasi masalalariga javob bergan.
Abdumuxtor Ergashev (1977-yilda tug‘ilgan) 2000-yilda Termiz davlat universitetini tamomlagan, 2004-yilda Toshkent davlat iqtisodiyot universitetini, 2009-yilda esa Prezident huzuridagi Davlat boshqaruvi akademiyasini tamomlagan.
U turli yillarda qishloq xo‘jaligi vazirining o‘rinbosari (2018—2019), qishloq va suv xo‘jaligi vazirining o‘rinbosari vazifasini bajaruvchi (2017—2018), Vazirlar Mahkamasi qishloq va suv xo‘jaligi, qishloq xo‘jaligi mahsulotlarini qayta ishlash hamda iste’mol tovarlari masalalari axborot-tahlil departamenti qishloq xo‘jaligini isloh qilish va fermerlikni rivojlantirish sho‘basi fermerlikni rivojlantirish bo‘yicha bosh mutaxassisi (2010—2017) va boshqa lavozimlarni egallagan.
2020-yilning noyabrida bosh prokuror Nig‘matilla Yo‘ldoshev bosh vazir o‘rinbosari Jamshid Qo‘chqorovga don yetishtirish xarajatlarini moliyalashtirishda Qishloq xo‘jaligini davlat tomonidan qo‘llab-quvvatlash jamg‘armasidan mablag‘ ajratish va sarflashning qonuniyligini tekshirish to‘g‘risida so‘rov yuborgandi.
Bundan tashqari, Moliya vazirligi mansabdor shaxslari, jumladan, vazir o‘rinbosari Abdumuxtor Ergashevning qonunbuzilish holatlariga aloqadorligini tekshirish rejalashtirilgandi. Tekshiruv natijalari e’lon qilinmagan.
Izoh (0)