Prezident Shavkat Mirziyoyev Namangandagi 26-Mehribonlik uyiga tashrifi chog‘ida bag‘riga bosgan qizaloq oilasiga qaytdi. Bu haqda “Daryo” muxbiri Azizbek Abduvaliyev xabar berdi.
Fotima Umrzoqova hozir 5 yoshda. U va egizak ukasi Husan 2 yil, opalari Hadicha va Halima esa 3 yildan beri bolalar uyida tarbiyalanayotgan edi.
— Ularning onasi yolg‘iz ayol bo‘lgani va yetishmovchilik tufayli bolalarini bizning muassasaga topshirgan edi. Yil boshidan ularni olib ketish harakatiga tushib qoldi. Qizalog‘ini davlat rahbari ko‘tarib olganini ko‘rganidan keyin bu fikri yana ham qat’iylashgan bo‘lsa ajab emas. O‘tgan vaqt mobaynida ularga biz ham qattiq bog‘lanib qolgan ekanmiz, ko‘zda yosh bilan kuzatib qo‘ydik. Lekin oilasida, onasining bag‘rida bo‘lishi biz uchun muhim, shundan xursandmiz, — deydi Mehribonlik uyi direktori Dilorom Abdurahimova.
Biz Umrzoqovlar oilasi istiqomat qilayotgan Namangan viloyatining Yangiqo‘rg‘on tumanidagi “Qorayontoq” mahallasida ham bo‘ldik. Bolalarning onasi Nilufarning aytishicha, ularni asli kuz oylariga borib, ishlab, pul topib, uy-joy sharoitini o‘nglagandan so‘ng qaytarib olmoqchi bo‘lgan, biroq oiladagi vaziyatdan xabar topgan “Saxovat-Namangan” xayriya jamoat fondi a’zolari bu tashvishlarni o‘z zimmasiga olgan.
— “Bolalarni zoriqtirmang, olib keling, uyni o‘zimiz ta’mirlab beramiz” deyishdi. Shu yil yanvaridan xonadonimizga ustalar tushdi, chala bitgan uylarimiz hozirgi shinam holatga keldi. Fotimani televizorda ko‘rib, qo‘ni-qo‘shnilar bu haqda aytganidan keyin esa o‘zim ham shoshib qoldim. Endi bolalarimni maktab va bog‘chalarga beraman, o‘zim ishga kiraman. Ota-onam o‘tib ketishgan bo‘lsa ham ukam yordam berib turibdi. Qolaversa, saxovatpesha insonlar ham qarab turishmayapti, men kutgandan ortiq yordam berishyapti, — deydi Nilufar Umrzoqova.
“Saxovat-Namangan” xayriya jamoat fondi vakili Baxtiyor Yusufjonovning ta’kidlashicha, Nilufar va uning bolalari yashaydigan xonadon boshdan-oyoq ta’mirlab berilgan. Hovliga darvoza, uylarga eshik-rom o‘rnatilgan, shift va pol qilingan, ko‘rpa-to‘shak, idish-tovoqqacha yetkazilgan. Kelgusida ham bolalardan doimiy xabar olib turiladi va ular uchun barcha zarur sharoit yaratib beriladi.
Ma’lumot uchun, Namangandagi 26-Mehribonlik uyini 13 nafar tarbiyalanuvchi tark etgan. Ulardan 5 nafari farzandlikka berilgan bo‘lsa, 8 nafari oilasiga qaytgan. Oilasiga qaytganlar safida Fotima, uning ikki opasi hamda egizak ukasi ham bor.
Izoh (0)