Ijtimoiy tarmoqlarda suzmani oyoqda qorib, undan qurut tayyorlayotgan ayollar videosi tarqaldi. Ushbu holat Samarqandda bo‘lgani aniqlandi. Bu haqda “Zamon” informatsion dasturi xabar qildi.
Ma’lum qilinishicha, qurutlar Samarqand viloyati Ishtixon tumani Kallaxosa qishlog‘ining “Dehqonobod” mahallasida tayyorlanadi. Videoda suzmani oyog‘ida qorgan ayolning aytishicha, u yaqinda farzandli bo‘lgani uchun suzmani qo‘lda qorishga qiynalgan. Shuning uchun oyoqda qorganini aytgan.
“Sog‘lig‘im to‘g‘ri kelmagani sabab qo‘limning kuchi yetmay, oyoq kiyimda suzmani qordim. Qo‘shnimiz tasvirga olgandi”, — deydi ayol.
Tasvirlarni ularning qo‘shnisi olgan va internetga joylagan.
“Shunchaki qiziqish bilan, hangama uchun olingan video edi. Hech qanday maqsad yo‘q edi bundan. Faqat TikTok’ka qo‘ygandim. O‘zimning qurut tayyorlash bo‘yicha umuman tushuncham bo‘lmagan”, — deydi videoga olgan ayol.
Mahalla raisi bu video ushbu hududda qurut savdosi bilan shug‘ullanuvchi boshqa oilalarning biznesiga raxna solganini aytmoqda.
“Biz bu ayollar bilan tushuntirish ishlarini olib borgandik. Qurutni men o‘zim yaxshi ko‘rib yer edim. Endi bu videoni ko‘rib, ko‘z oldimdan ketmay qoldi. Boshqa tadbirkorlarda ko‘rganmiz, ular yaxshi tayyorlaydi.
Yaqinda farzandli bo‘lgan kelin kuchi yetmaganini aytdi. Lekin bu bahona bo‘lolmaydi. Har bir insonda vijdon bo‘lishi kerak”, — deydi mahalla raisi.
Sanitariya-epidemiologik osoyishtalik markazi xodimlari qurutlarni tegishli tartibda yo‘q qilgan.
Bundan avval Toshkent viloyatida itlar so‘yib sotilayotgani to‘g‘risidagi xabar o‘z tasdig‘ini topmagani, Qoraqalpog‘istonda eshaklar “qabristoni” aniqlangani va ushbu hayvonlar go‘shti sotuvga chiqarilgan bo‘lishi mumkinligi hamda Navoiyda sanitariya qoidalarini buzgan holda 15 bosh qo‘y go‘shtini Toshkentga olib kelayotgan Cobalt haydovchisi jarimaga tortilgani haqida xabar berilgandi.
Izoh (0)