BMTning Narkotik va jinoyatchilikka qarshi kurash bo‘yicha boshqarmasi (UNODC)ning Markaziy Osiyodagi mintaqaviy vakolatxonasi O‘zbekistonda yangi tashkil etilgan Chegara aloqa bo‘linmalari va idoralararo mobil guruhlar uchun uskunalar taqdim qildi. Bu haqda “Gazeta.uz” xabar bermoqda.
Ma’lum qilinishicha, Vazirlar Mahkamasi huzuridagi Giyohvand moddalarni nazorat qilish milliy axborot-tahlil markazi, Davlat bojxona qo‘mitasi, Davlat xavfsizlik xizmati, Ichki ishlar vazirligi, IIV Chegara qo‘shinlari va Bosh prokuratura huzuridagi Iqtisodiy jinoyatlarga qarshi kurashish departamentiga 674 ming dollarlik 14 ta avtomashina, strategik, taktik uskunalar va ofis texnikalari taqdim qilingan.
Uskunalar UNODC va Yaponiya hukumati o‘rtasidagi 2020-yil fevral oyida imzolangan Markaziy Osiyoda giyohvand moddalar savdosiga qarshi kurashga qaratilgan 6,8 million dollarlik grant shartnomasi asosida berilgan.
Ushbu mablag‘larga Markaziy Osiyodagi Chegara aloqa bo‘linmalari va O‘zbekistondagi Idoralararo mobil guruhlarni tashkil etish ko‘zda tutilgandi.
Uskunalarni topshirish marosimida UNODC’ning Markaziy Osiyo bo‘yicha mintaqaviy vakili Ashita Mittal, Yaponiyaning O‘zbekistondagi elchisi Yoshinori Fudziyama, Vazirlar Mahkamasi huzuridagi Narkotik moddalarni nazorat qilish Milliy axborot-tahlil markazi direktori Olim Narzullayev va boshqalar ishtirok etdi.
Avvalroq Toshkent shahar hokimligi huzuridagi situatsion markazni qo‘llab-quvvatlash uchun qiymati 500 ming dollardan ortiq uskunalar Davlat bojxona qo‘mitasiga taqdim etilgandi. Uning rasmiy ochilishi yaqin orada bo‘lib o‘tadi.
Izoh (0)