Samarqandda o‘quvchilarni majburiy mehnatga jalb qilgan maktab direktori o‘rinbosari 15,6 mln so‘m jarimaga tortildi

Samarqandda maktab o‘quvchilari majburiy mehnatga jalb qilingani, aybdorlar esa shunchaki hayfsan bilan qutilib qolayotgani haqida xabar qilingandi. Bandlik va mehnat munosabatlari vazirligi ushbu maqola yuzasidan Davlat mehnat inspeksiyasi o‘rganish olib borganini ma’lum qildi.

Ta’kidlanishicha, o‘rganish davomida Samarqand viloyati Toyloq tumani xalq ta’limi bo‘limiga qarashli 13-umumiy o‘rta ta’lim maktabi direktorining o‘quv ishlari bo‘yicha o‘rinbosari Nafisa Ismatullayeva 2020-yil 5-dekabr kuni 5 va 8-sinf o‘quvchilarini maktab hududini obodonlashtirish ishlariga jalb qilib, hashar tashkil etganligi aniqlandi.

Natijada 2021-yilning 29-yanvar kuni mazkur maktab direktorining o‘quv ishlari bo‘yicha o‘rinbosari Ma’muriy javobgarlik to‘g‘risidagi kodeksning 51-moddasi 2-qismida (voyaga yetmaganlarni mehnatga majburlash) nazarda tutilgan huquqbuzarlikni sodir etganligi sababli bazaviy hisoblash miqdorining 70 barobari (15 million 610 ming so‘m) miqdorida jarimaga tortildi.

Ma’lumot uchun, 12-fevraldan boshlab O‘zbekistonda bolalarni majburiy mehnatga jalb qilganlar to‘g‘ridan to‘g‘ri jinoiy javobgarlikka tortilishi belgilandi.

Bundan avval Cotton Campaign O‘zbekiston 2020-yilgi paxta terimida majburiy mehnatga barham berishda “sezilarli yutuqlar”ga erishganini ma’lum qilgani, O‘zbekistonda 2020-yilgi paxta mavsumida mehnat qonunchiligini buzgan 174 nafar mansabdor 745,7 million so‘m jarimaga tortilgani hamda O‘zbekistonda voyaga yetmaganlarni majburiy mehnatga jalb qilganlik uchun 5 yilgacha qamoq jazosini belgilash taklif qilingani haqida xabar berilgandi.