Ижтимоий тармоқларда сузмани оёқда қориб, ундан қурут тайёрлаётган аёллар видеоси тарқалди. Ушбу ҳолат Самарқандда бўлгани аниқланди. Бу ҳақда «Замон» информацион дастури хабар қилди.
Маълум қилинишича, қурутлар Самарқанд вилояти Иштихон тумани Каллахоса қишлоғининг «Деҳқонобод» маҳалласида тайёрланади. Видеода сузмани оёғида қорган аёлнинг айтишича, у яқинда фарзандли бўлгани учун сузмани қўлда қоришга қийналган. Шунинг учун оёқда қорганини айтган.
«Соғлиғим тўғри келмагани сабаб қўлимнинг кучи етмай, оёқ кийимда сузмани қордим. Қўшнимиз тасвирга олганди», — дейди аёл.
Тасвирларни уларнинг қўшниси олган ва интернетга жойлаган.
«Шунчаки қизиқиш билан, ҳангама учун олинган видео эди. Ҳеч қандай мақсад йўқ эди бундан. Фақат TikTok’ка қўйгандим. Ўзимнинг қурут тайёрлаш бўйича умуман тушунчам бўлмаган», — дейди видеога олган аёл.
Маҳалла раиси бу видео ушбу ҳудудда қурут савдоси билан шуғулланувчи бошқа оилаларнинг бизнесига рахна солганини айтмоқда.
«Биз бу аёллар билан тушунтириш ишларини олиб боргандик. Қурутни мен ўзим яхши кўриб ер эдим. Энди бу видеони кўриб, кўз олдимдан кетмай қолди. Бошқа тадбиркорларда кўрганмиз, улар яхши тайёрлайди.
Яқинда фарзандли бўлган келин кучи етмаганини айтди. Лекин бу баҳона бўлолмайди. Ҳар бир инсонда виждон бўлиши керак», — дейди маҳалла раиси.
Санитария-эпидемиологик осойишталик маркази ходимлари қурутларни тегишли тартибда йўқ қилган.
Бундан аввал Тошкент вилоятида итлар сўйиб сотилаётгани тўғрисидаги хабар ўз тасдиғини топмагани, Қорақалпоғистонда эшаклар «қабристони» аниқлангани ва ушбу ҳайвонлар гўшти сотувга чиқарилган бўлиши мумкинлиги ҳамда Навоийда санитария қоидаларини бузган ҳолда 15 бош қўй гўштини Тошкентга олиб келаётган Cobalt ҳайдовчиси жаримага тортилгани ҳақида хабар берилганди.
Изоҳ (0)