Sardoba texnogen ofatining sabablarini o‘rganayotgan rossiyalik mutaxassislarga qancha mablag‘ ajratilishi ma’lum qilindi

Sardoba suv omborining hozirgi holati va yuzaga kelgan texnogen ofatning sabablarini o‘rganish uchun jalb qilingan Moskva davlat qurilish universiteti mutaxassislari mazkur jarayon bilan salkam bir yildan buyon shug‘ullanmoqda. Bu haqda qurilish vaziri Botir Zokirov 1-mart, dushanba kuni vazirlikda o‘tkazilgan matbuot anjumanidan so‘ng jurnalistlarga bergan intervyusida ta’kidlab o‘tdi, deya xabar qilmoqda “Daryo” muxbiri.

Zokirovning aytishicha, rossiyalik mutaxassislar hamkorlik shartnomasini Qurilish vazirligi bilan tuzgan bo‘lib, ularga beriladigan mablag‘ vazirlik huzuridagi fond mablag‘lari hisobidan to‘lanadi.

“Moskva davlat qurilish universiteti mutaxassislariga 124 ming dollar to‘lanishi belgilangan. Hozirgi kunda ushbu mablag‘ning, taxminan, 50 foizini to‘laganmiz. Ushbu mablag‘lar vazirlik huzuridagi fond hisobidan Vazirlar Mahkamasining qarori asosida yo‘naltirilyapti. Mutaxassislar salkam bir yildan beri to‘rt bosqichdan iborat mazkur jarayonni o‘rganmoqda. Ular mart oyi oxirigacha so‘nggi xulosani taqdim etishadi”, — dedi Botir Zokirov.