Сардоба сув омборининг ҳозирги ҳолати ва юзага келган техноген офатнинг сабабларини ўрганиш учун жалб қилинган Москва давлат қурилиш университети мутахассислари мазкур жараён билан салкам бир йилдан буён шуғулланмоқда. Бу ҳақда қурилиш вазири Ботир Зокиров 1 март, душанба куни вазирликда ўтказилган матбуот анжуманидан сўнг журналистларга берган интервьюсида таъкидлаб ўтди, дея хабар қилмоқда «Дарё» мухбири.
Зокировнинг айтишича, россиялик мутахассислар ҳамкорлик шартномасини Қурилиш вазирлиги билан тузган бўлиб, уларга бериладиган маблағ вазирлик ҳузуридаги фонд маблағлари ҳисобидан тўланади.
«Москва давлат қурилиш университети мутахассисларига 124 минг доллар тўланиши белгиланган. Ҳозирги кунда ушбу маблағнинг, тахминан, 50 фоизини тўлаганмиз. Ушбу маблағлар вазирлик ҳузуридаги фонд ҳисобидан Вазирлар Маҳкамасининг қарори асосида йўналтириляпти. Мутахассислар салкам бир йилдан бери тўрт босқичдан иборат мазкур жараённи ўрганмоқда. Улар март ойи охиригача сўнгги хулосани тақдим этишади», — деди Ботир Зокиров.
Изоҳ (0)