Pashinyanga Rossiyaning “Iskander” raketalari haqida noto‘g‘ri ma’lumot berilgani ma’lum qilindi

Armaniston bosh vaziri Nikol Pashinyanning Rossiyada ishlab chiqarilgan “Iskander” raketa komplekslari to‘g‘risida aytgan so‘zlariga unga holat haqida noto‘g‘ri ma’lumot berilgani sabab bo‘lgan. Bu haqda bosh vazirning matbuot kotibi Mane Gevorgyanning so‘zlariga tayanib, “RBK” xabar berdi.

Bosh vazir vakilining so‘zlariga ko‘ra, Pashinyanning Rossiya prezidenti Vladimir Putin bilan telefon orqali muloqoti paytida uning “Iskander”ni Armaniston tomonidan qo‘llanilishi to‘g‘risidagi bayonoti muhokama qilingan.

“Mavjud faktlar va ma’lumotlarni taqqoslash asosida Armaniston bosh vaziri ushbu holat to‘g‘risida unga to‘g‘ri ma’lumot berilmagan, degan xulosaga keldi”, — dedi Gevorgyan. Matbuot kotibining qo‘shimcha qilishicha, Pashinyan aytgan gaplarning “harbiy-sanoat kooperatsiyasi sohasidagi Armaniston—Rossiya ittifoqchilik munosabatlarining mazmuni va sifatiga hech qanday aloqasi yo‘q”. Gevorgyan Rossiya qurollarini “dunyodagi eng yaxshi qurollardan biri” deb atadi.

“RIA Novosti”ning xabar berishicha, Rossiya prezidentining matbuot kotibi Dmitriy Peskov jurnalistlarga Kreml mazkur bayonotdan mamnunligini aytgan. “Bu boradagi haqiqat tiklangani juda muhim”, — deydi matbuot kotibi.

Eslatib o‘tamiz, 23-fevral kuni Armaniston bosh vaziri 1in.am kanaliga bergan intervyusida 2020-yilning kuzida Tog‘li Qorabog‘dagi mojaro paytida Yerevan qo‘llagan “Iskander” raketalari “portlamagan yoki 10 foiz qismigina portlagan”ini aytgan. Bunga javoban Rossiya Mudofaa vazirligi Pashinyanning so‘zlarini “ajablanib” o‘qigani haqida xabar qilgan, chunki vazirlik ma’lumotlariga ko‘ra, Armaniston mojaro paytida ushbu komplekslardan foydalanmagan. Vazirlik Pashinyanni chalg‘itishgan bo‘lishi mumkinligi va, ehtimol, shu sababli u noto‘g‘ri ma’lumotlardan foydalangan, deya taxmin qildi.