Rossiya va Suriyaning idoralararo muvofiqlashtiruvchi shtabi qo‘shma bayonot chiqarib, AQShni suriyalik jangarilarga gumanitar yordam ko‘rsatishda aybladi. Unga ko‘ra, go‘yoki Qo‘shma Shtatlar BMTdan Rukban qochqinlar lageri aholisi uchun gumanitar yordam olib, uni Vashington nazorati ostidagi jangarilarga o‘tkazmoqda. Bu haqda “Kommersant” xabar berdi.
“Qo‘shma Shtatlar lager aholisiga gumanitar yordam yetkazib berish zarurati mavzusini muntazam ravishda ko‘tarib, BMT rahbariyatiga bosim o‘tkazish uchun mavjud vaziyatdan foydalanmoqda. Shu bilan birga, amerikaliklar aslida ushbu yordamdan hududda faoliyat yuritayotgan o‘z nazoratlari ostidagi jangarilarni ta’minlash uchun foydalanishni maqsad qilgan, va aslida, ular avval ham bir necha bor shunday qilgan”,— deyiladi bayonotda.
Moskva va Damashq Vashingtonni “AQSh bosib olgan hudud va uning ichida joylashgan Rukban lagerida sodir bo‘layotgan barcha narsalar” uchun javobgar qildi. Javobgarlikda xususan, Suriya hukumati nazoratiga qaytarilgunga qadar aholini suv, oziq-ovqat va eng zarur narsalar bilan ta’minlash nazarda tutilmoqda.
Eslatib o‘tamiz, 26-fevralga o‘tar kechasi AQSh Suriyada Damashqni qo‘llab-quvvatlovchi eronparast ko‘ngillilar qo‘shini bilan bog‘liq binoga aviazarba berdi. Ma’lumotlarga ko‘ra, zarba mudofaa xususiyatiga ega bo‘lgan va fevral oyida ko‘ngillilar qo‘shini tomonidan Amerika harbiylariga uyushtirilgan uchta hujumga javob bo‘lgan.
Shundan keyin Eron AQShning Yaqin Sharqdagi harakatlari mintaqadagi zo‘ravonlikni kuchaytirishi mumkinligidan xavotir bildirdi. AQShning Suriyadagi Eronga aloqador obyektlarga havo zarbasini berishi mintaqadagi zo‘ravonliklarni yanada kuchaytirib yuborishi mumkin, dedi Eron prezident apparati huzuridagi Strategik tadqiqotlar markazi xalqaro loyihasining direktori Diako Husayniy.
Izoh (0)