Пашинянга Россиянинг «Искандер» ракеталари ҳақида нотўғри маълумот берилгани маълум қилинди

Арманистон бош вазири Никол Пашиняннинг Россияда ишлаб чиқарилган «Искандер» ракета комплекслари тўғрисида айтган сўзларига унга ҳолат ҳақида нотўғри маълумот берилгани сабаб бўлган. Бу ҳақда бош вазирнинг матбуот котиби Мане Геворгяннинг сўзларига таяниб, «РБК» хабар берди.

Бош вазир вакилининг сўзларига кўра, Пашиняннинг Россия президенти Владимир Путин билан телефон орқали мулоқоти пайтида унинг «Искандер»ни Арманистон томонидан қўлланилиши тўғрисидаги баёноти муҳокама қилинган.

«Мавжуд фактлар ва маълумотларни таққослаш асосида Арманистон бош вазири ушбу ҳолат тўғрисида унга тўғри маълумот берилмаган, деган хулосага келди», — деди Геворгян. Матбуот котибининг қўшимча қилишича, Пашинян айтган гапларнинг «ҳарбий-саноат кооперацияси соҳасидаги Арманистон—Россия иттифоқчилик муносабатларининг мазмуни ва сифатига ҳеч қандай алоқаси йўқ». Геворгян Россия қуролларини «дунёдаги энг яхши қуроллардан бири» деб атади.

«РИА Новости»нинг хабар беришича, Россия президентининг матбуот котиби Дмитрий Песков журналистларга Кремль мазкур баёнотдан мамнунлигини айтган. «Бу борадаги ҳақиқат тиклангани жуда муҳим», — дейди матбуот котиби.

Эслатиб ўтамиз, 23 февраль куни Арманистон бош вазири 1in.am каналига берган интервьюсида 2020 йилнинг кузида Тоғли Қорабоғдаги можаро пайтида Ереван қўллаган «Искандер» ракеталари «портламаган ёки 10 фоиз қисмигина портлаган»ини айтган. Бунга жавобан Россия Мудофаа вазирлиги Пашиняннинг сўзларини «ажабланиб» ўқигани ҳақида хабар қилган, чунки вазирлик маълумотларига кўра, Арманистон можаро пайтида ушбу комплекслардан фойдаланмаган. Вазирлик Пашинянни чалғитишган бўлиши мумкинлиги ва, эҳтимол, шу сабабли у нотўғри маълумотлардан фойдаланган, дея тахмин қилди.