AQSh yaqin haftalarda Rossiyaga qarshi yangi sanksiyalar qo‘llashi mumkin. Bu haqda jurnalistlar bilan suhbatda Oq uyning matbuot kotibi Jen Psaki ma’lum qilgan, deb yozmoqda “Interfaks”.
Psaki “Rossiyaga qarshi qo‘shimcha sanksiyalarning qo‘llanilishini yana qancha kutish kerak?” deya berilgan savolga: “Bunga bir necha oy emas, balki bir necha hafta vaqt ketadi. Bu tanaffussiz o‘tadigan jarayon”, – deb javob qaytargan.
Shuningdek, Oq uy vakili jarayonda Rossiya tomonidan “Tolibon” harakati jangarilarining Afg‘onistonda amerikalik harbiylarni o‘ldirilgani uchun mukofot pullari to‘langani haqidagi axborotlar, rossiyalik xakerlarning AQSh hukumati idoralariga kiberhujumlari diqqat bilan o‘rganilishini ta’kidlagan.
“Bu borada bir nechta omillar o‘rganiladi”, – degan Psaki.
Oq uyning matbuot kotibi AQSh administratsiyasining milliy xavfsizlik va kiberxavfsizlik bo‘yicha jamoasi qayd etilgan axborotlar bo‘yicha ishlarni tezroq yakunlashi talab etilishini eslatgan.
“Nima bo‘lgan taqdirda ham prezidentning (Bayden) o‘zi sanksiyalarni ochiq yoki yopiq holda qo‘llash yuzasidan yakuniy qaror chiqaradi. Lekin menimcha mazkur masalalar yuzasidan o‘rganishlar bir necha oy emas, balki bir necha hafta davom etadi”, – degan Jen Psaki.
Avval Federal qidiruv byurosi (FQB) AQSh siyosiy tizimiga aralashishda ayblanayotgan Rossiya fuqarosi Konstantin Kilimnikni hibsga olishga yordam beradigan ma’lumot uchun 250 ming dollar mukofot puli taklif qilayotgani, AQSh Milliy razvedka boshlig‘i idorasi jurnalist Jamol Qoshiqchining 2018-yilning 2-oktabrida Istanbulda o‘ldirilishi to‘g‘risidagi hisobotni e’lon qilib, jurnalistni qo‘lga olish yoki o‘ldirish bo‘yicha operatsiyani Saudiya Arabistoni valiahd shahzodasi Muhammad bin Salmonning shaxsan o‘zi ma’qullaganini aniqlagani, AQSh iqtisodiyoti 2020-yilda rekord darajada pasaygani haqida xabarlar berilgan.
Izoh (0)