АҚШ яқин ҳафталарда Россияга қарши янги санкциялар қўллаши мумкин. Бу ҳақда журналистлар билан суҳбатда Оқ уйнинг матбуот котиби Жен Псаки маълум қилган, деб ёзмоқда «Интерфакс».
Псаки «Россияга қарши қўшимча санкцияларнинг қўлланилишини яна қанча кутиш керак?» дея берилган саволга: «Бунга бир неча ой эмас, балки бир неча ҳафта вақт кетади. Бу танаффуссиз ўтадиган жараён», – деб жавоб қайтарган.
Шунингдек, Оқ уй вакили жараёнда Россия томонидан «Толибон» ҳаракати жангариларининг Афғонистонда америкалик ҳарбийларни ўлдирилгани учун мукофот пуллари тўлангани ҳақидаги ахборотлар, россиялик хакерларнинг АҚШ ҳукумати идораларига киберҳужумлари диққат билан ўрганилишини таъкидлаган.
«Бу борада бир нечта омиллар ўрганилади», – деган Псаки.
Оқ уйнинг матбуот котиби АҚШ администрациясининг миллий хавфсизлик ва киберхавфсизлик бўйича жамоаси қайд этилган ахборотлар бўйича ишларни тезроқ якунлаши талаб этилишини эслатган.
«Нима бўлган тақдирда ҳам президентнинг (Байден) ўзи санкцияларни очиқ ёки ёпиқ ҳолда қўллаш юзасидан якуний қарор чиқаради. Лекин менимча мазкур масалалар юзасидан ўрганишлар бир неча ой эмас, балки бир неча ҳафта давом этади», – деган Жен Псаки.
Аввал Федерал қидирув бюроси (ФҚБ) АҚШ сиёсий тизимига аралашишда айбланаётган Россия фуқароси Константин Килимникни ҳибсга олишга ёрдам берадиган маълумот учун 250 минг доллар мукофот пули таклиф қилаётгани, АҚШ Миллий разведка бошлиғи идораси журналист Жамол Қошиқчининг 2018 йилнинг 2 октябрида Истанбулда ўлдирилиши тўғрисидаги ҳисоботни эълон қилиб, журналистни қўлга олиш ёки ўлдириш бўйича операцияни Саудия Арабистони валиаҳд шаҳзодаси Муҳаммад бин Салмоннинг шахсан ўзи маъқуллаганини аниқлагани, АҚШ иқтисодиёти 2020 йилда рекорд даражада пасайгани ҳақида хабарлар берилган.
Изоҳ (0)