Kanada sog‘liqni saqlash vazirligi 26-fevral kuni Angliya–Shvetsiya kompaniyasi AstraZeneca’ning COVID-19 koronavirusiga qarshi vaksinasidan foydalanishga ruxsat berdi, deya xabar berdi “Interfaks”
“AstraZeneca’ning vaksinasi pandemiya sababli va mamlakatning COVID-19 bilan bog‘liq olib kirish, sotish va reklama to‘g‘risida vaqtinchalik farmonining 5-bandiga muvofiq foydalanishga tasdiqlandi”, – deyiladi Kanada Sog‘liqni saqlash vazirligi xabarida.
Hujjatda aytilishicha, vaksina 18 yoshdan katta odamlarni faol emlash uchun tavsiya etiladi. Uning samaradorligi 62,1 foizga baholanmoqda.
Fevral oyi boshida Jahon sog‘liqni saqlash tashkiloti mutaxassislari 18 yoshdan katta bo‘lgan barcha kattalar uchun Angliya–Shvetsiya kompaniyasi AstraZeneca tomonidan ishlab chiqarilgan koronavirusga qarshi COVID-19 vaksinasidan foydalanishni tavsiya qildi.
Yevropa dorilar agentligi yanvar oyining oxirida ushbu preparatni qo‘llashni ma’qulladi. Shundan so‘ng, Yevropa Ittifoqi rasmiylari vaksinani o‘z bozoriga chiqarishga qaror qildi.
AZD1222 vaksinasi AstraZeneca farmatsevtika kompaniyasi mutaxassislari tomonidan Oksford universiteti olimlari bilan birgalikda ishlab chiqilgan. Bu vektorli vaksina hisoblanadi. Vektorli vaksinalarning ishlash prinsipi shundaki, ular tarkibida zaiflashgan zararsiz virus va koronavirus genining yangi turi mavjud.
Bundan avval JAR AstraZeneca’ning bir millionta vaksinasini qaytarib berishi, Janubiy Koreya koronavirusga qarshi AstraZeneca vaksinasini ma’qullagani hamda O‘zbekiston COVAX dasturi doirasida 2,6 million doza AstraZeneca vaksinasini olishi haqida xabar berilgandi.
Izoh (0)