O‘zbekistonlik bokschilar Ukrainadagi xalqaro musobaqada 6 ta medalga ega chiqdi

Ukrainaning Krivoy Rog shahrida 23—27-fevral kunlari boks bo‘yicha xalqaro musobaqa o‘tkazildi.

Unda mezbonlar mamlakatdan tashqari, O‘zbekiston, Qozog‘iston, Moldova va Iordaniya kabi davlatlardan bokschilar qatnashdi. 27-fevral kuni musobaqaning final uchrashuvlari o‘tkazildi. Finalga qadar uch nafar o‘zbekistonlik bokschi yetib kelgandi.

Abdumalik Xalakov (-57 kg) va Saidjamshid Jafarov (-75 kg) finalni g‘alaba bilan yakunlab, oltin medalga sazovor bo‘ldi. Sodirbek Kamolmirzayev (-52 kg) esa kumush bilan cheklandi.

Shuningdek, Jahongir Rahmonov (-69 kg), Jamshid Xudoyberganov (+91 kg) va Shohjahon Abdullayev (+91 kg) bronza medaliga sazovor bo‘ldi.

Shu tariqa O‘zbekiston terma jamoasi 2 ta oltin, 1 ta kumush va 3 ta bronza medallari bilan ortga qaytadigan bo‘ldi.