«Шахсга доир маълумотлар тўғрисида»ги қонунга қўшимчалар киритилиб, Ўзбекистон фуқароларининг шахсий маълумотларини мамлакатда сақлаш мажбурий этиб белгилангани ҳақида хабар берилган эди. Ўзгартиришлар апрель ўрталаридан бошлаб кучга киради.
Spot’нинг ёзишича, куни кеча Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси («Ўзкомназорат») бунинг аниқ тартибини тасдиқловчи ҳукумат қарори лойиҳасини жамоатчилик муҳокамаси учун тақдим этди.
Унга кўра, Оммавий коммуникациялар масалалари бўйича марказ ва Давлат персоналлаштириш маркази интернетда доимий равишда мониторинг қилади. Агар у ёки бу сайт шахсга доир маълумотларни сақлаш ва унга ишлов бериш қоидаларини бузгани аниқланса, бу ҳақда хулоса тузилиб, «Ўзкомназорат»га юборилади.
Инспекция тақдим этилган хулоса асосида аниқланган камчиликларни бартараф этиш юзасидан қонунбузарга (у оператор ёки шахсга доир маълумотлар базаси мулкдори бўлиши мумкин) аниқ муддат белгилаган ҳолда тегишли тақдимнома ёки кўрсатма беради. У тақдимномада ёки кўрсатмада келтирилган камчиликларни бартараф этиш чорасини кўриши ва бу ҳақда «Ўзкомназорат»ни хабардор қилиши лозим.
Тақдимнома ёки кўрсатма талаблари бажарилмаган тақдирда, инспекция тақдимномадаги муддатдан сўнг уч кун ичида судга тегишли ҳужжатлар тўпламини юборади. Суд қарори асосида қонунбузар махсус реестрга киритилади. Ахборот технологиялари вазирлиги 12 соат ичида сайт фаолиятини чеклайди.
Сайтга кириш тикланиши мумкин — бунинг учун оператор ёки унинг эгаси қонунбузарликни бартараф этиши, бу ҳақда инспекцияни хабардор қилиши лозим.
Инспекция камчиликлар бартараф этилганлиги юзасидан билдирган ёзма (электрон) мурожаатини ўрганиб, Оммавий коммуникациялар масалалари бўйича марказга тақдим этади. У эса бу ҳақда Давлат персоналлаштириш марказига маълум қилади. Шу асосда Давлат персоналлаштириш маркази хулоса беради, шундан сўнг қонунбузар реестрдан чиқарилади.
Изоҳ (0)