Ўзбекистонда аёллар ўртасида нафас олиш, ҳазм қилиш аъзолари, юрак-қон томир тизими касалликлари юқорилигича қолмоқда. 2020 йили 207 нафар аёлда ҳомилада туғма нуқсон аниқланган. Бу ҳақда Президент Шавкат Мирзиёев раислигида ўтказилган йиғилишда таъкидланди, дея хабар бермоқда «Дарё» мухбири.
Йиғилишда давлат раҳбари Соғлиқни сақлаш вазирлиги раҳбариятига вилоят, туман ва шаҳар ҳокимлари билан бирга, «аёллар дафтари»га кирган 44 минг нафар хотин-қизни алоҳида назоратга олиб, уларни икки ҳафта муддатда тиббиёт бригадаларига бириктириш бўйича топшириқ берди. Бунда касалликнинг турига қараб, тор доирадаги шифокорларни жалб қилган ҳолда уларни даволашни бошлаш зарурлиги қайд этилди.
«Тиббий ҳимояга муҳтожлар нисбатан энг кўп Тошкент ва Жиззах вилоятларида – 5 минг нафардан, Тошкент шаҳри ва Самарқандда – 4 минг нафардан, Сурхондарё ва Фарғонада – 3,5 мингта, Андижонда – 3 мингтани ташкил қилади. Туман (шаҳар)лар кесимида нисбатан кўп Форишда – 2 минг нафар, Бухоро ва Бешариқ туманларида – 1 минг нафардан, Пахтаободда – 800 нафар.
Республика Хотин-қизлар жамоатчилик кенгаши Танзила Норбоева, соғлиқни сақлаш вазири ўринбосари Элмира Боситхонова 2021 йил якунига қадар қарийб 9 миллион нафар хотин-қизни чуқурлаштирилган тиббий кўрикдан, жумладан, уларни кўкрак бези ва аёллар касалликлари саратони скринингидан ўтказиши ҳамда касаллик аниқланганларини мақсадли соғломлаштириш чораларининг кўрилишига шахсан масъул бўлади. Ушбу ишларни тизимли ва маҳаллабай ташкил этиш бўйича бир ой муддатда қарор лойиҳаси ишлаб чиқилиши зарур», – деди Шавкат Мирзиёев.
Тадбирда таъкидланишича, Қорақалпоғистонда – 39 минг, Андижонда – 79 минг, Бухорода – 41 минг, Жиззахда – 37 минг, Навоийда – 22 минг, Қашқадарёда – 85 минг, Наманганда – 75 минг, Самарқандда – 96 минг, Сирдарёда – 21 минг, Сурхондарёда – 71 минг, Фарғонада – 94 минг, Тошкент вилоятида – 71 минг, Хоразмда – 44 минг, Тошкент шаҳрида – 51 минг нафар ҳомиладор аёллар қатъий назоратга олинади. Хотин-қизлар орасида онкологик касалликларни камайтириш мақсадида Элмира Боситхонова 2021 йилда 323 минг нафар қизларни одам папилломаси вирусига қарши эмлашни ташкиллаштиради.
Мавзуга доир:
- «Вилоят ҳокимлари маҳаллий бюджет ҳисобидан 100 нафардан хотин-қизларнинг контракт пулини тўлаб беради» – Шавкат Мирзиёев
- «80 минг нафар хотин-қизнинг муаммолари 3 ойда ҳал этилди» – Шавкат Мирзиёев «аёллар дафтари» ҳақида
- «Энг ачинарлиси, аёлларни хўрлаш ва омма олдида сазойи қилиш оддий ҳолатга айланиб бормоқда» – Шавкат Мирзиёев
- Шавкат Мирзиёев: «Афсуски, барча аёлларга ҳам жамиятда ўрнини топиши учун муносиб шароит, имконият яратиб бера олмаяпмиз»
Изоҳ (0)