«Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисида»ги низом 24 февраль куни Ўзбекистон Адлия вазирлиги рўйхатидан ўтказилди, деб хабар бермоқда вазирлик матбуот хизмати.
Хабарда айтилишича, низом билан давлат органлари ва ташкилотлари томонидан чеклист тўлдириш орқали коррупциявий омилларни аниқлашни назарда тутувчи мутлақо янги тартиб жорий этилди. Бунда ҳужжатнинг ҳар бир нормаси ва қоидаси таҳлил қилиниб, коррупциявий омил бор ёки йўқлиги чеклистда акс эттирилади.
Шу билан бирга, коррупциявий омиллар тўлиқ қайта кўриб чиқилди ҳамда ҳуқуқни қўлловчилар ва фуқароларга уларнинг маъноси аниқ, лўнда ва батафсил мисоллар билан ёритилган методика асосида тушунтириб берилмоқда.
Жумладан, қонунчиликда асоссиз равишда истиснолар киритилишини назарда тутиш чекланди, қабул қилинаётган норма барча учун ягона ва умумий бўлиши белгиланди.
Норматив-ҳуқуқий ҳужжат лойиҳаларини ишлаб чиқувчиларга қулайлик яратиш мақсадида коррупциявий омилларга аниқ мисоллар келтирилган.
«Эндиликда лойиҳаларни коррупцияга қарши экспертизадан ўтказишда жамоатчилик кенг жалб қилинади. Бунда фуқаролар regulation.gov.uz порталида чеклист тўлдириш орқали қонун ҳужжатлари лойиҳалари бўйича ўз фикр ва мулоҳазаларини билдириши мумкин», — деб таъкидланган хабарда.
Бундан ташқари, амалдаги қонун ҳужжатларининг коррупцияга қарши экспертизаси ҳозирги кунда самарали йўлга қўйилган ҳуқуқий мониторинг тизими доирасида ўтказилиши белгиланган.
Эслатиб ўтамиз, Ўзбекистон Transparency International ташкилотининг 2020 йилда эълон қилган рейтингида коррупция бўйича 26 балл билан 183 та мамлакат орасида 146-ўринда қайд этилганди. Мамлакат 7 поғонага кўтарилган.
Шавкат Мирзиёев коррупцияга қарши курашнинг янги тузилмаларини ташкил қилиш бўйича 2020 йилда ўтказган йиғилишда Ўзбекистон Transparency International индексида охирги уч йилда 12 поғонага кўтарилган бўлса-да, ҳали бу иллат барҳам топмаганини таъкидлаган эди. Президент 2020 йил 29 декабрь куни Олий Мажлисга йўллаган Мурожаатномасида «Коррупцияга тоқатсизлик ҳаётимиз бир қисмига айланиши керак», деб айтганди. Давлат раҳбари 2021 йил 27 январь куни ўтказган йиғилишда бош прокурорга ҳудудларга коррупция бўйича «ташхис қўйиш» топшириғини берди.
Изоҳ (0)