Олий Мажлис Сенати раиси Танзила Норбоева «Америка овози»га берган интервьюсида ҳозирда Ўзбекистон парламенти бутунлай мустақил орган эканлигини маълум қилди, деб ёзмоқда «Gazeta.uz»
У парламент Президентга тобе деган тушунчага қўшилмаслигини айтган.
«Парламент Президентга бўйсунади деган гаплар ўтмишга, аввалги дунёқарашга тегишли. Албатта, парламент Президент айтган муаммоларни кўриб чиққан. Ҳатто қабул қилинадиган қарорлар мувофиқлаштирилган. Аммо ҳозир ундай эмас. Ҳозир кун тартибини ўзимиз шакллантирамиз. Илгари парламентга энергия тизими ёки Сардобани ўрганишга ким йўл берган? Биз ўрганиб чиқдик, муҳокама қилиш учун воқеа жойига бордик, жавобгарларни сўроқ қилиш учун чақирдик, кўрсатмалар бердик. Бу парламент мустақиллигининг натижаси эмасми?», — деган Сенат раиси.
Парламент юқори палатаси раисининг таъкидлашича, Сенат ўз ишини «кимгадир ёқиш учун» мослаштирмайди.
«Президент айтганидек, энг муҳими одамларни рози қилиш. Биз эса халқ вакилимиз… Бу Президентга ёқади, чунки биз Президентнинг сиёсатини биламиз. Президент сиёсати — одамларни рози қилиш», — деган у.
Танзила Норбоеванинг айтишича, ҳозирда ҳеч ким парламентга босим ўтказмайди.
«Ҳозир биз бутунлай мустақилмиз. Ҳеч ким бизга босим ўтказмайди. Ҳеч ким ‘мен айтганимдек қиласан, у масалани кўриб чиқ ёки кўриб чиқма’ демайди. Бундай сўзлар ҳозир кун тартибидан чиққан», — деб таъкидлаган парламент юқори палатаси раҳбари.
Унинг сўзларига кўра, Сенат Президент администрацияси томонидан кўриб чиқилган ёки 150 нафар депутат томонидан қабул қилинган қонунни тасдиқламаслиги мумкин — агар ҳужжат инсон ҳуқуқлари талабларига жавоб бермаса, Ўзбекистон рейтингига салбий таъсир кўрсатса ёки алоҳида идора манфаатларни ифода этса. Масалан, 2020 йилда юқори палата олтита қонунни рад этди.
Аввалроқ Президент Шавкат Мирзиёев Ўзбекистон мамлакатнинг ижтимоий-иқтисодий ҳаётига оид деярли барча масалаларни президент ҳужжатлари ёрдамида тартибга солиши шарт эканлигини айтганди. Давлат раҳбари депутатлар ташаббуси билан илгари сурилган қонунлар бармоқ билан саноқли эканини айтган. Президент депутатлар етарлича ташаббус кўрсатмаётганини 2017 йилда ҳам танқид қилган.
Изоҳ (0)