Davlatobod tumani madaniyat saroyida xalq deputatlari Namangan viloyat, shahar va tuman kengashlarining Oliy Majlis Senati a’zosi saylovi bo‘yicha qo‘shma majlisi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Majlis ishida mahalliy kengashlardan saylangan 389 nafar deputat ishtirok etdi. Uning kun tartibiga bitta masala — bo‘shab qolgan o‘ringa Oliy Majlis Senati a’zosini saylash masalasi kiritildi.
Shahar-tuman kengashlari deputatlaridan iborat maslahat kengashi qo‘shma majlis muhokamasiga 6-Serob saylov okrugidan xalq deputatlari viloyat kengashi deputati, viloyat hokimi Shavkatjon Abdurazzoqov nomzodini yashirin ovoz berish uchun byulletenga kiritishni taklif qildi.
Mazkur taklif ma’qullandi va yashirin ovoz berish jarayoni boshlandi.
Shundan so‘ng sanoq komissiyasining hisoboti tinglandi. Unga ko‘ra, Shavkatjon Abdurazzoqov Oliy Majlis Senati a’zosi etib saylandi.
Deputatlar ovoz berish natijalarini tasdiqladi.
“Senatorlik juda yuksak maqom, ushbu maqom egasiga qo‘shimcha mas’uliyat yuklaydi. Bugun menga bildirilgan ishonchni oqlash, xalqimizga sadoqat bilan xizmat qilish uchun bor kuchimni sarflayman”, — dedi Shavkatjon Abdurazzoqov.
Mavzuga doir: Buxoro viloyati hokimi Botir Zaripov senator bo‘ldi
Izoh (0)