Дунёда COVID-19 қурбонлари сони 2,5 миллиондан ошди

Пандемия бошидан буён бутун дунёда 2,5 миллион киши коронавирус оқибатида вафот этди. Бу ҳақда вирус тарқалишини реал вақтда кузатиб келаётган Жонс Ҳопкинс университети маълумотларида келтирилган.

COVID-19 қурбонларининг аксарияти қуйидаги мамлакатларга тўғри келади:

• АҚШ — 506,2 минг киши;
• Бразилия — 249,9 минг;
• Мексика —182,8 минг;
• Ҳиндистон — 156,7 минг;
• Буюк Британия —122,3 минг;
• Италия — 96,6 минг;
• Франция — 85,4 минг.

Жаҳон соғлиқни сақлаш ташкилоти (ЖССТ) маълумотларига кўра, сўнгги бир ҳафта ичида, 15—21 февраль, кунлари дунёда коронавирус оқибатида 66,3 минг киши вафот этди. Ушбу кўрсаткич аввалги ҳафтага нисбатан 20 фоизга кам. ЖССТ маълумотларига кўра, COVID-19’нинг тарқалиши суръати секинлашди. Ўтган ҳафта дунё бўйлаб 2,4 миллион кишида инфекция аниқланган, бу аввалги ҳафтага нисбатан 11 фоизга кам.Шунингдек, ЖССТ Буюк Британияда аниқланган коронавируснинг юқумлироқ тури ўтган ҳафта давомида яна еттита мамлакатда аниқлангани ҳақида хабар қилган. Унга кўра, 16 февралда ўтказилган сўнгги янгиланишдан бери коронавируснинг «британча» штамми яна еттита мамлакатда қайд этилди. 23 февраль ҳолатига кўра, жами 101 та мамлакат касаллик ўз ҳудудларига олиб кирилгани ҳақида маълум қилган.

Бундан ташқари, Жанубий Африкада пайдо бўлган штаммнинг тарқалиш географияси ҳам кенгайган. Сўнгги бир ҳафта ичида «африкача» штамм яна бешта мамлакатда аниқланган ва мазкур штамм қайд этилган мамлакатлар сони жами 51 тага етган. ЖССТ ушбу штаммдаги мутациялар вируснинг иммунитет тизими таъсиридан қочишга ёрдам беришини таъкидлади. Шунинг учун мазкур штамм аввал COVID-19 билан касалланган ёки коронавирусга қарши эмланганлар учун ҳам хавфлидир.

Бразилия ва Японияда пайдо бўлган штаммлар эса яна саккизта давлатда қайд этилган. Умумий ҳисобда ушбу штаммлар 29 та мамлакатда аниқланган.