Namangan viloyati To‘raqo‘rg‘on tumanida bank vakillari va tadbirkor o‘zaro til biriktirib, “Har bir oila — tadbirkor” dasturi doirasida fuqarolarga ajratilgan pulni talon-toroj qilgani aniqlandi, deya “Daryo”ga xabar bermoqda Bosh prokuratura.
Bosh prokuratura huzuridagi Departamentning To‘raqo‘rg‘on tuman bo‘limi tomonidan tergovga qadar tekshiruv o‘tkazilgan.
Tekshiruv davomida “S.” va “D.” MChJ rahbari J.A. ATB “Agrobank” To‘raqo‘rg‘on filiali mas’ul shaxslari bilan oldindan til biriktirib, “Har bir oila — tadbirkor” dasturi doirasida 25 nafar fuqaroga ajratilgan 669,4 million so‘m imtiyozli kreditni o‘zi rahbarlik qilayotgan jamiyatlar hisob raqamiga o‘tkazib, hujjatlarni qalbakilashtirish yo‘li bilan talon-toroj qilganliklari aniqlangan.
Mazkur holat yuzasidan Jinoyat kodeksining 167-moddasi 3-qismi (ko‘p miqdorda firibgarlik), 228-moddasi 2 va 3-qismlari (bir guruh shaxslar tomonidan oldindan til biriktirib sodir etilgan hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Toshkentda bankomatlarga joylashtirish uchun ajratilgan 2,3 milliard so‘mni o‘zlashtirgan bank xodimlari ushlangani, “Yoshlar — kelajagimiz” jamg‘armasining katta miqdordagi mablag‘ini talon-toroj qilgan bosh hisobchi ishdan olingani hamda Samarqanddagi korxona mansabdor shaxslari salkam 12,5 milliard so‘mni talon-toroj qilgani ma’lum bo‘lgani haqida xabarlar berilgandi.
Izoh (0)