Shavkat Mirziyoyev 23-fevral kuni “Sog‘liqni saqlash sohasida raqamlashtirish ishlarini samarali tashkil etish chora-tadbirlari to‘g‘risida”gi qarorni imzoladi.
Unga ko‘ra, “Axborot kommunikatsiya texnologiyalarini rivojlantirish markazi” DUK negizida Sog‘liqni saqlash vazirligi muassisligida IT-Med MChJ tashkil etiladi.
IT-Med sog‘liqni saqlash sohasida axborot tizimlari va ma’lumotlar bazalarini yaratish, rivojlantirish, joriy qilish, kuzatish va xizmat ko‘rsatish kabi vazifalarni amalga oshiradi.
Yuklangan vazifalarni amalga oshirish doirasida malakali mutaxassislarni, shu jumladan, chet ellik mutaxassislarni maslahatchi sifatida jalb qilish huquqiga ega.
Qarorda belgilanishicha, 2024-yil 1-yanvardan boshlab respublikadagi barcha tibbiyot va farmatsevtika tashkilotlari, shu jumladan, dorixonalar majburiy tartibda bosqichma-bosqich yagona platformaga ulanadi.
Shuningdek, 2023-yil 1-yanvargacha aholi va tizim foydalanuvchilari tomonidan interaktiv tibbiy xizmatlarni olish imkonini beruvchi maxsus dastur va mobil ilovalar ishlab chiqilib, ishga tushiriladi.
Izoh (0)