Наманган вилояти Тўрақўрғон туманида банк вакиллари ва тадбиркор ўзаро тил бириктириб, «Ҳар бир оила — тадбиркор» дастури доирасида фуқароларга ажратилган пулни талон-торож қилгани аниқланди, дея «Дарё»га хабар бермоқда Бош прокуратура.
Бош прокуратура ҳузуридаги Департаментнинг Тўрақўрғон туман бўлими томонидан терговга қадар текширув ўтказилган.
Текширув давомида «С.» ва «Д.» МЧЖ раҳбари Ж.А. АТБ «Агробанк» Тўрақўрғон филиали масъул шахслари билан олдиндан тил бириктириб, «Ҳар бир оила — тадбиркор» дастури доирасида 25 нафар фуқарога ажратилган 669,4 миллион сўм имтиёзли кредитни ўзи раҳбарлик қилаётган жамиятлар ҳисоб рақамига ўтказиб, ҳужжатларни қалбакилаштириш йўли билан талон-торож қилганликлари аниқланган.
Мазкур ҳолат юзасидан Жиноят кодексининг 167-моддаси 3-қисми (кўп миқдорда фирибгарлик), 228-моддаси 2 ва 3-қисмлари (бир гуруҳ шахслар томонидан олдиндан тил бириктириб содир этилган ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Тошкентда банкоматларга жойлаштириш учун ажратилган 2,3 миллиард сўмни ўзлаштирган банк ходимлари ушлангани, «Ёшлар — келажагимиз» жамғармасининг катта миқдордаги маблағини талон-торож қилган бош ҳисобчи ишдан олингани ҳамда Самарқанддаги корхона мансабдор шахслари салкам 12,5 миллиард сўмни талон-торож қилгани маълум бўлгани ҳақида хабарлар берилганди.
Изоҳ (0)