Samarqandda ayolinining katta miqdordagi puliga ko‘chmas mulk sotib olib, so‘ngra uni u yerdan chiqarib yuborgan erga nisbatan jinoiy ish ochildi, deya xabar bermoqda Tergov departamenti.
Ma’lum qilinishicha, 2021-yilning 20-yanvar kuni 45 yoshli D.U. (ayol) ariza bilan murojaat qilgan. Arizaga ko‘ra, ayolning shar’iy turmush o‘rtog‘i 43 yoshli Sh.U. uning ishonchiga kirib, 2012-yil 21-avgust kuni Samarqand shahar Buyuk Ipak Yo‘li ko‘chasida joylashgan xonadonlardan birini bank orqali yosh oilalarga beriladigan imtiyozli kredit asosida ukasi U.D.ning nomiga sotib olgan.
Keyinchalik ushbu xonadonni nomiga o‘tkazib berishni va’da qilib, undan xonadon uchun 2013-yildan 2017-yilning dekabr oyiga qadar 35 000 AQSh dollari olgan.
So‘ngra xonadon uchun kredit to‘lovlari to‘liq so‘ndirilib, ayolni esa ushbu xonadondan chiqartirib yuborish uchun fuqarolik ishlari bo‘yicha shahar sudi tomonidan qaror chiqarilganligini ma’lum qilgan.
Mazkur holat yuzasidan Samarqand shahri bo‘yicha IIO FMB huzuridagi tergov bo‘limi tomonidan Jinoyat kodeksining 168-moddasi (juda ko‘p miqdorda firibgarlik) 4-qismi “a” bandi bilan jinoyat ishi qo‘zg‘atilib, tergov harakatlariga kirishilgan.
Hozirda tergov harakatlari davom etmoqda.
Bundan avval Buxoroda fuqaroni ishga joylashtirish evaziga 700 dollar pora talab qilgan katta hamshira qo‘lga olingani, Sardoba suv ombori toshqinidan foyda ko‘rmoqchi bo‘lgan firibgar 3,5 yilga qamalgani hamda Samarqandda pullarini ko‘paytirib berishini aytib, fuqarolardan 22 250 dollargacha pul olib, qaytarib bermagan kompaniya aniqlangani haqida xabar berilgandi.
Izoh (0)