Buxoro viloyatining Peshku va G‘ijduvon tumanlarida ikkita shamol elektr stansiyasini qurish to‘g‘risidagi investitsiya kelishuvi Prezidentning 23-fevraldagi qarori bilan tasdiqlandi, deb xabar bermoqda “Gazeta.uz”.
Buxoro viloyatida 500-1000 MVt quvvatli ikkita shamol elektr stansiyasi qurilishi, buning uchun viloyatning Peshku hamda G‘ijduvon tumani hududlari tanlab olingani haqida 2020-yilning iyulida ma’lum bo‘lgandi. 2020-yilning sentabrida Peshku va G‘ijduvon tumanlarida shamol elektr stansiyalarining 10 meteorologik ustuni o‘rnatilgandi.
Mazkur stansiyalarni qurish bo‘yicha Energetika vazirligi hamda investor va loyiha kompaniyasi bo‘lgan Saudiya Arabistoni ACWA Power o‘rtasida kelishuv 2021-yilning 24-yanvarida imzolandi. Kompaniya tomonidan Peshku tumanida ACWA Power Dzhankeldy Wind, G‘ijduvon tumanida esa ACWA Power Bash Wind ta’sis etildi.
G‘ijduvon tumanidagi shamol elektr stansiyasi quvvati 500 MVtni, Peshku tumanidagi shamol elektr stansiyasi quvvati esa 300-500 MVtni tashkil etadi. Har bir loyihani amalga oshirish uchun investor 650 million dollardan mablag‘ ajratmoqchi.
Ushbu elektr stansiyalarida ishlab chiqilgan elektr energiyasi “O‘zbekiston milliy elektr tarmoqlari” AJ tomonidan 25 yil davomida kafolatlangan tarzda sotib olinadi.
Avvalroq Energetika vazirligi ACWA Power kompaniyasini Navoiy viloyatida davlat-xususiy sherikchilik asosida quvvati 500 MVt bo‘lgan shamol elektr stansiyasi qurilishiga jalb etish rejalashtirayotganini ma’lum qilgan edi. Elektr stansiyasini 2022-yilda foydalanishga topshirish belgilangan.
2021-yilning 24-yanvarida ACWA Power kompaniyasi tomonidan Sirdaryoda tabiiy gazni ikki barobar iqtisod qilgan holda elektr energiyasi ishlab chiqaradigan IES qurilishi boshlandi.
Izoh (0)