Samarqand viloyati Paxtachi tumani “Ko‘rpa” mahallasidagi xonadonlarning birida “qanotli” buzoq tug‘ildi. Bu haqda “Paxtachi” gazetasi muxbiri xabar berdi.
Ma’lum qilinishicha, 20-fevral kuni tug‘ilgan ushbu “qanotli” buzoqcha “Ko‘rpa” mahallasida yashovchi G‘aybulla Xayrullayevga tegishli.
“Homila egizak bo‘lgan bo‘lsa, zo‘rlik qilib oyoq bu buzoqqa o‘tgan bo‘lishi mumkin”, — deya g‘ayrioddiy holatga izoh beradi G‘aybulla Xayrullayev.
Videodan ko‘rish mumkinki, buzoqchaning o‘ng tomonida qanotga o‘xshash oyoqcha mavjud.
“Buzoqchaning sog‘lig‘i yaxshi. Faqatgina o‘ng tomonidan rudimentlashgan beshinchi oyoq o‘sib chiqqan. Buni Xudoning elimizga, xalqimizga bergan barakasi deb bilamiz. Onasi oldingi bolasini egiz tug‘gan. Otalanish jarayonida buzoq egiz bo‘la olmay, to‘lig‘icha yetisha olmay qolgan”, — deydi Paxtachi tumani veterinariya boshlig‘i Mehriddin Mavlonov.
Ta’kidlanishicha, mazkur buzoqchani ko‘rish uchun ko‘plab fuqarolar tashrif buyurmoqda. “Hatto uning evaziga mo‘may pul bermoqchi bo‘lganlar ham ko‘paygan”, — deyiladi xabarda.
Eslatib o‘tamiz, 2018-yilning martida Samarqand viloyatining Jomboy tumanida 6 oyoqli buzoq, 2014-yili Jizzaxda esa 5 oyoqli qo‘zichoq tug‘ilgan edi.
Izoh (0)