Farg‘onada muqaddam sudlangan tadbirkor o‘zining qizi bilan yozishib yurgan voyaga yetmagan o‘smirni kaltakladi, deb xabar beradi Repost.
Ma’lumotlarga ko‘ra, 21-fevral kuni “Tojmahal” mehmonxonasi, banket zali va alkogol mahsulotlari bilan savdo qiluvchi qator do‘konlar, Wine Garden restorani egasi Bahodir Payg‘amov hamda uning 11-sinfda o‘qiydigan Nurmuhammad Komiljonov ismli o‘g‘li yaqindagina 40-sonli maktabda o‘qishni boshlagan 14 yoshli Hojiakbar Shavkatzodani kaltaklagan. Payg‘amov bunga qadar Jinoyat kodeksining 97- va 164-moddalari (qotillik, bosqinchilik) bilan sudlangan.
Ma’lum qilishicha, ko‘ngilsiz hodisa Quruvchilar-2 ko‘chasidagi Kirgili turar joy mavzesida sodir bo‘lgan. Shuningdek, “Parvoz” maktabining o‘quvchisi 14 yoshli yigitga pichoq bilan tahdid qilgan. Hojiakbarning kaltaklanishiga uning Bahodir Payg‘amovni qizi bilan yozishmalar orqali muloqoti sabab bo‘lgan. Jabrlanuvchi 9-sinf o‘quvchisi Farg‘onadagi shoshilinch tibbiy yordamining neyrojarrohlik bo‘limiga yotqizilgan.
“O‘g‘lim bir hafta oldin 9-sinfni ‘Sirius’ xususiy maktabida o‘qishni boshladi. Parallel sinfda yoki sinfdoshi bo‘lgan qiz bilan tanishib qolgan. Ular yozishib yurgan. Uyda yo‘qligimda qizning otasi va akasi kelib yozishmalari sabab uni kaltaklagan. O‘g‘lim 9-sinfda o‘qiydi. Hozirda uning ahvoli og‘ir va maktabga bormayapti. Bu kabi yomon odamlarni xalqqa ko‘rsating. Bahodir deganlari ikki ayolni o‘ldirib, Karkidonda yoqib yuborgan. O‘tirib chiqqan bo‘lsa ham, aqli kirmagan. 14 yoshli bolani shunchalik kaltaklash mumkinmi”, — deydi jabrlanuvchining onasi Gulruh Sobirova.
Bahodir Payg‘amov ham mazkur ko‘ngilsiz hodisaga izoh berib, jabrlanuvchining onasidan kechirim so‘ragan.
“Kechiring singlim, ming bor uzr, biz ham bilmas edik. Men faqatgina qizimning izzatini himoya qildim. Bunchalik bo‘lib ketishini bilmagandim”, — deydi Payg‘amov.
Holat yuzasidan ish ochilgan, biroq tergov jarayonlari hali boshlanmagan.
Avvalroq farg‘onalik yigit internet orqali tanishgan qizi unga turmushga chiqmasligini aytgani uchun qizning uyiga borib, 2 oylik chaqaloqni o‘ldirgani to‘g‘risida xabar berilgandi.
Mavzuga doir:
Izoh (0)