Tesla va SpaceX kompaniyalari rahbari Ilon Mask bir kecha-kunduzda 15 milliard dollar yo‘qotdi va dunyoning eng boy odami maqomidan mahrum bo‘ldi. Bu haqda The Economic Times xabar berdi.
Tesla aksiyalarining bahosi 8,6 foizga pasayishi tufayli biznesmenning boyligi 183 milliard dollarga tushdi. Ta’kidlanishicha, bunga tadbirkorning bitkoin narxiga bildirgan munosabati sabab bo‘lishi mumkin.
Ilon Mask 20-fevral kuni Twitter’da bitkoin va eferium kriptovalyutalari narxi haddan tashqari oshib ketgani haqida tvit qoldirgandi. Har qanday ma’lumotlar tizimi singari kriptovalyutalar ham kechikuvchi javoblar va xatolarga moyil, deya qo‘shimcha qilgan u. Shu bilan birga, mazkur tvitdan ikki hafta oldin Tesla 1,5 milliard dollar miqdorida bitkoin sotib olganini e’lon qilgan.
Eslatib o‘tamiz, 19-fevralda Ilon Mask dunyodagi eng boy kishilari reytingida birinchi o‘ringa qaytdi. O‘shanda tadbirkorning boyligi 199,9 milliard dollarga yetgan. Hozirda birinchilikni Amazon asoschisi Jeff Bezos egallab turibdi, uning boyligi 186 milliard dollarga baholanmoqda.
Avvalroq Ilon Maskning elektromobillar ishlab chiqaruvchi Tesla kompaniyasi 2020-yilning to‘rtinchi choragida 270 million, yil davomida esa jami 721 million dollar sof foyda ko‘rganini ma’lum qilgan edi. Tesla o‘z tarixida birinchi marta yil davomida zarar ko‘rmadi. Taqqoslash uchun, kompaniya 2019-yilda 862 million dollar miqdorida sof zararni qayd etgan. Biroq, xabarga ko‘ra, 2020-yilning to‘rtinchi choragidagi natijalar investorlarning umidini oqlamadi, bundan tashqari, kompaniya 2021-yil uchun avtomobillarni yetkazib berish bo‘yicha aniq maqsadni taqdim etmadi, oqibatda Tesla aksiyalari 5 foizga tushdi.
Izoh (0)