AQSh Milliy immunizatsiya va respirator kasalliklari markazi vakili doktor Amanda Kon koronavirusga qarshi vaksina samara bergan, bermaganligini aniqlashning oson yo‘lini ma’lum qildi, deb yozmoqda Deseret News.
Shifokor preparatning samaradorligini ko‘rsatuvchi uchta belgini sanab o‘tdi. Birinchi belgi — shpris o‘rnida og‘riq qolishi. Ikkinchi belgi — charchoq, chunki kishilar vaksina qabul qilganidan so‘ng o‘zlarini juda toliqqan his qilayotgani haqida aytgan. Oxirgi belgi bu 37,1-38,0 °C oralig‘idagi subfebril harorat bilan isitmalash.
Mutaxassisning so‘zlariga ko‘ra, ushbu belgilarning barchasi vaksinaning virusga qarshi kurashish uchun organizm mudofaasini kuchaytirish choralarini olib borayotganidan dalolat beradi. Konning ta’kidlashicha, nojo‘ya ta’sirlar odatda bir necha kun davom etadi va bundan tashvishlanmaslik kerak.
“Bu COVID-19 emas. Bu sizning tanangiz kasallikka taqlid qiluvchi oqsilga nisbatan immunitet hosil qilayotganini bildiradi” — dedi shifokor.
Shuningdek, olimlarning tadqiqotlariga ko‘ra, COVID-19’dan tuzalganlar uchun vaksinaning ikkinchi dozasi shart bo‘lmasligi mumkin. Koronavirusdan tuzalgan odamning tanasida virusga qarshi vaksinaning birinchi dozasidan keyin zarur immunitet reaksiyasi paydo bo‘ladi. Tadqiqotlarda koronavirusdan tuzalgan bemorlarda immunitet miqdorining yuqoriligi virusga chalinmasdan, vaksinaning har ikkala dozasini qabul qilgan kishilardagi immunitet miqdori bilan baravar ekani ma’lum bo‘ldi.
Avvalroq olimlar koronavirusga qarshi vaksinalar COVID-19’ning yangi shtammlari paydo bo‘lishi sababli vaqt o‘tib eskirishi mumkinligi haqida ogohlantirgandi. Hozirda Buyuk Britaniya, AQSh va koronavirusga qarshi vaksinalarni ishlab chiqargan hamda chiqarayotgan boshqa davlatlar mutatsiyaga uchragan virusdan samaraliroq himoya qilish uchun vaksinalarni yangilash variantlarini izlamoqda.
Izoh (0)