Самарқандда аёлинининг катта миқдордаги пулига кўчмас мулк сотиб олиб, сўнгра уни у ердан чиқариб юборган эрга нисбатан жиноий иш очилди, дея хабар бермоқда Тергов департаменти.
Маълум қилинишича, 2021 йилнинг 20 январь куни 45 ёшли Д.У. (аёл) ариза билан мурожаат қилган. Аризага кўра, аёлнинг шаръий турмуш ўртоғи 43 ёшли Ш.У. унинг ишончига кириб, 2012 йил 21 август куни Самарқанд шаҳар Буюк Ипак Йўли кўчасида жойлашган хонадонлардан бирини банк орқали ёш оилаларга бериладиган имтиёзли кредит асосида укаси У.Д.нинг номига сотиб олган.
Кейинчалик ушбу хонадонни номига ўтказиб беришни ваъда қилиб, ундан хонадон учун 2013 йилдан 2017 йилнинг декабрь ойига қадар 35 000 АҚШ доллари олган.
Сўнгра хонадон учун кредит тўловлари тўлиқ сўндирилиб, аёлни эса ушбу хонадондан чиқартириб юбориш учун фуқаролик ишлари бўйича шаҳар суди томонидан қарор чиқарилганлигини маълум қилган.
Мазкур ҳолат юзасидан Самарқанд шаҳри бўйича ИИО ФМБ ҳузуридаги тергов бўлими томонидан Жиноят кодексининг 168-моддаси (жуда кўп миқдорда фирибгарлик) 4-қисми «а» банди билан жиноят иши қўзғатилиб, тергов ҳаракатларига киришилган.
Ҳозирда тергов ҳаракатлари давом этмоқда.
Бундан аввал Бухорода фуқарони ишга жойлаштириш эвазига 700 доллар пора талаб қилган катта ҳамшира қўлга олингани, Сардоба сув омбори тошқинидан фойда кўрмоқчи бўлган фирибгар 3,5 йилга қамалгани ҳамда Самарқандда пулларини кўпайтириб беришини айтиб, фуқаролардан 22 250 долларгача пул олиб, қайтариб бермаган компания аниқлангани ҳақида хабар берилганди.
Изоҳ (0)