Prezident Namanganga tashrifi chog‘ida yangi barpo etilishini aytgan “Saxovat” uyida qurilish ishlari boshlandi. Bu haqda “Daryo” muxbiri Azizbek Abduvaliyev xabar bermoqda.
Hozirgi bino 1982-yilda qurilgan bo‘lib, avval paxta tozalash zavodining dala hovlisi bo‘lgan. Ayni paytda bu yerda 14 nafar qariya yashaydi.
— Menga “Saxovat” uylariga ehtiyoji bo‘lgan nuroniylardan juda ko‘p xatlar keladi. Shularni inobatga olib, ijtimoiy himoyani kuchaytiramiz. 4 oy ichida Namangan shahrida “Saxovat” uyi uchun yangi bino qurib beriladi. Sizlar munosib sharoitlarda yashaysiz, davolanasiz, — degan edi davlat rahbari nuroniylar bilan suhbatda.
Namangan shahrining “Orzu” mahallasida “Saxovat” uyi qurilishi qaytadan boshlandi. Aslida 50 o‘rinli bu dargohni barpo etishga 2016-yilda kirishilgan, biroq turli sabablarga ko‘ra qurilish to‘xtab qolgan.
“Saxovat” uyi 120 o‘ringa qayta rekonstruksiya qilinmoqda. “Saxovat” uyi energotejamkor, yashash, dam olish va sog‘ligini tiklash uchun barcha sharoitlarga ega bo‘lishi ko‘zda tutilgan. Sanuzellari ichida bo‘lgan ikki kishilik xonalar, basseyn, trenajyor zallari bu yerda istiqomat qiluvchilar ixtiyorida bo‘ladi.
Izoh (0)