Farg‘ona viloyatining Uchko‘prik tumanida “Yoshlar daftari”ga kiritilgan 45 nafar ishsiz yoshga dehqonchilik qilish uchun yer ajratib berildi. Bu haqda “Daryo”ga viloyat hokimligi axborot xizmati ma’lum qildi.
Qayd etilishicha, shu kunga qadar mahalla fuqarolar yig‘inlarining tavsiyasi va ishchi guruh a’zolarining “mahallabay” o‘rganishlari asosida “Yoshlar daftari”ga kiritilgan ishsiz, migrant, nogironligi bor va ijtimoiy ko‘makka muhtoj 303 nafar yoshga dehqonchilik qilish uchun yer berilgan.
Endilikda bu yigit-qizlar oila a’zolari ko‘magida dehqonchilik qilib, yilda uch martagacha hosil olish uchun ishlaydi.
“11 yildan beri Rossiya va Qozog‘istonda ishlardim. Karantinda yo‘llar yopilib, ishga keta olmadim. Mana bir yildan beri ishsiz edim. Bugun mahalladan chaqirishib, 20 sotixdan yer berishdi. Bu yerdan unumli foydalanib, kartoshka va sabzavot mahsulotlari yetishtirmoqchiman. Bir yil davomida shu yerda mehnat qilib, uch marta hosil olib, 25 million so‘mdan ortiq daromad olishni mo‘ljallab turibman”, — dedi Abbos Alimqulov.
Ta’kidlanishicha, ishsiz yoshlarning bandligini ta’minlash, ularni moliyaviy qo‘llab-quvvatlash, turmush sharoitini yaxshilash, qishloq joylarda yangi ish o‘rinlari yaratish maqsadida 84 nafar yoshga 6 milliard 835 million so‘m imtiyozli kredit ajratilgan.
Mavzuga doir:
Izoh (0)