O‘zbekiston Jurnalistika va ommaviy kommunikatsiyalar universiteti rektori Sherzodxon Qudratxo‘ja bosma nashrlarda faoliyat ko‘rsatuvchi jurnalistlar bilan muloqotda gazetalarning “yashab qolishi” haqida so‘z yuritib, “Gazeta kerak, albatta, qachonki uning o‘z o‘quvchisi bo‘lsa. Majburiy tartibda obuna qilingan nashr baribir o‘qilmaydi”, dedi. Bu haqda Farg‘ona viloyatida bo‘lib o‘tayotgan to‘qqizinchi an’anaviy Chimyon mediaforumida so‘z bordi, deya xabar berdi “Daryo” muxbiri.
Ta’kidlanishicha, mediaforumga mehmon sifatida taklif qilingan Sherzodxon Qudratxo‘ja “An’anaviy jurnalistika va elektron OAV raqibmi yoki hamkor? Ijtimoiy tarmoqlarning jamiyat rivojidagi o‘rni” mavzusida so‘z yuritib, an’anaviy jurnalistikada qalam tebratayotgan jurnalistlar savoliga javob bergan.
“Yangi avlod vakillari ham gazetani bajonidil o‘qiydi, o‘qimaydi desak xato bo‘ladi. Ammo ular endi gazetani qog‘ozda emas, gadjetlarda o‘qiydi. Xuddi badiiy kitoblarni elektron shaklda o‘qiganidek, gazetani ham shunday o‘qiydi. Qachonki, gazetada uni qiziqtira oladigan material bo‘lsa. Ming afsuski, bugungi kun o‘quvchisi hatto an’anaviy televideniyeni ham ko‘rmay qo‘ydi. Ko‘radi faqat internetda o‘ziga qulay payt, muhit hamda makonda. Gazeta ishlab chiqaruvchilar ‘bizga gazeta kerak’, deyishyapti. Albatta, kerak. Bunga hech kim qarshilik qilmaydi, gazeta kerakligini inkor ham etmaymiz. Faqat biz majburiy obunaga qarshimiz. Endi vijdonan javob bering-chi, majburiy obuna qilingan nashr o‘qiladimi?”, — deya jurnalistlarga savol bilan yuzlandi Sherzodxon Qudratxo‘ja.
Mazkur savolga javob bergan “Buxoro shifokori” gazetasi muxbiri Ra’no Saidmurodova majburiy obuna qilingan gazeta ham, albatta, o‘qilishini ta’kidlab, “Biz yoshligimizda ota-onam gazetalarga majburiy obuna bo‘lib, gazeta uyga kelgach, bizni shu gazetani o‘qishga majbur qilardi. Biz esa, gazetani o‘qirdik”, — dedi.
“Hozirgi kunda bolalarni nimaga mabjur qilsangiz, ular teskarisini qiladi. Shuning uchun keling, biz ularga gazetani ular xohlayotgan formatda, shaklda beraylik”, — dedi bunga javob bergan jurnalistlarni tayyorlovchi universitet rektori.
“Yangi O‘zbekiston” gazetasining Namangan viloyati muxbiri Orifjon Jo‘rayev “Siz bugungi kunda kelajak jurnalistlarini yetishtirib beruvchi universitet rektori sifatida bosma nashrlarning kelajagiga shubha bilan qarasangiz, siz rahbarlik qilayotgan oliygohni tamomlagan talabalarda ertaga gazeta chiqaraman, gazetada ishlayman degan shasht bo‘larmikin”, — deb Sherzodxon Qudratxo‘jaga yuzlandi.
Mazkur savolga javob bergan Sherzodxon Qudratxo‘ja “Yana takrorlab aytamanki, gazeta yashaydi, qachonki uning o‘z o‘quvchisi bo‘lsa. Men gazetalar bugungi kun yoshlari istagan formatda ularga ma’lumot yetkazishini, o‘quvchilar talabidan kelib chiqqan holda gazeta chiqarishni taklif qilyapman. Internet nashrlari tanlagan yo‘lni tanlab, gazetalar o‘z saytini yaratishini ma’qullayman. Mayli, kim xohlasa gazeta chiqarsin, bu uning xohishi. Faqat maslahatimiz u chiqargan gazetani kimdir o‘qisin”, — deya javob berdi.
Izoh (0)