Президент Наманганга ташрифи чоғида янги барпо этилишини айтган «Саховат» уйида қурилиш ишлари бошланди. Бу ҳақда «Дарё» мухбири Азизбек Абдувалиев хабар бермоқда.
Ҳозирги бино 1982 йилда қурилган бўлиб, аввал пахта тозалаш заводининг дала ҳовлиси бўлган. Айни пайтда бу ерда 14 нафар қария яшайди.
— Менга «Саховат» уйларига эҳтиёжи бўлган нуронийлардан жуда кўп хатлар келади. Шуларни инобатга олиб, ижтимоий ҳимояни кучайтирамиз. 4 ой ичида Наманган шаҳрида «Саховат» уйи учун янги бино қуриб берилади. Сизлар муносиб шароитларда яшайсиз, даволанасиз, — деган эди давлат раҳбари нуронийлар билан суҳбатда.
Наманган шаҳрининг «Орзу» маҳалласида «Саховат» уйи қурилиши қайтадан бошланди. Аслида 50 ўринли бу даргоҳни барпо этишга 2016 йилда киришилган, бироқ турли сабабларга кўра қурилиш тўхтаб қолган.
«Саховат» уйи 120 ўринга қайта реконструкция қилинмоқда. «Саховат» уйи энерготежамкор, яшаш, дам олиш ва соғлигини тиклаш учун барча шароитларга эга бўлиши кўзда тутилган. Санузеллари ичида бўлган икки кишилик хоналар, бассейн, тренажёр заллари бу ерда истиқомат қилувчилар ихтиёрида бўлади.
Изоҳ (0)