Jahon sog‘liqni saqlash tashkiloti (JSST) COVAX dasturining 92 ta qashshoq a’zo-davlatlarining vaksinatsiya aks ta’siridan jabrlangan fuqarolariga tovon puli to‘laydi. Bu haqda The Guardian nashriga tayanib “Korrespondent.net” xabar berdi.
Ta’kidlanishicha, tashkilot kompensatsiya rejasini kelishib olgan.
“Har qanday da’volarni to‘liq va uzil-kesil qoplashda bir martalik kompensatsiya berish COVAX dasturi ustidan sudga murojaat qilish zaruriyatini sezilarli darajada kamaytiradi, chunki bu ancha uzoq cho‘ziladigan va qimmatga tushadigan jarayon”, — deyiladi The Guardian nashri xabarida.
COVAX vaksinasi doirasida jiddiy nojo‘ya ta’sirlarga duchor bo‘lgan odamlar tovon puli olishlari mumkin.
Kompensatsiya rejasi 92 ta qashshoq mamlakatni, shu jumladan, Afrika va Janubi-Sharqiy Osiyodagi ko‘plab mamlakatlarni qamrab oladi. Dastur 2022-yil 30-iyungacha davom etadi.
Ta’kidlanishicha, COVID-19 vaksinasini sotib olish uchun o‘zini o‘zi moliyalashtira oladigan mamlakatlar ham javobgarlik dasturlarini joriy etishni rejalashtirmoqda.
Avvalroq JSST 130 ga yaqin mamlakat koronavirusga qarshi vaksinasiz qolishini aytgan edi.
Izoh (0)