Braziliyaning sog‘liqni saqlashni tartibga soluvchi Anvisa kompaniyasi Pfizer va BioNTech tomonidan ishlab chiqarilgan koronavirusga qarshi vaksinadan foydalanishga ruxsat berdi, deb xabar bermoqda Agence France Presse (AFP) nashriga asoslanib “RIA Novosti”.
“17 kun davom etgan tekshiruvdan so‘ng COVID-19 vaksinasidan keng foydalanish uchun birinchi tasdiqni berishgani haqida xabar berish menga katta mamnuniyat bag‘ishlaydi”, – dedi Anvisa direktori Antonio Barra Torres.
Qayd etilishicha, Braziliya hukumati hali tasdiqlangan vaksinani sotib olmagan.
Braziliya avval Britaniyaning AstraZeneca va Xitoyning Sinovac COVID-19’ga qarshi vaksinalarini favqulodda vaziyatlarda foydalanish uchun tasdiqlagan edi. Bundan tashqari, Anvisa xalqaro COVAX mexanizmi orqali yetkazib beriladigan vaksinalarni ro‘yxatdan o‘tish talablaridan ozod qildi.
Bundan avval Braziliyada koronavirusga qarshi emlash vaksina tanqisligi sabab to‘xtatilgani, Pfizer va BioNTech o‘z vaksinasini homilador ayollarda sinashni boshlagani hamda shimoliy koreyalik xakerlar Pfizer kompaniyasi serverlariga hujum uyushtirgani haqida xabar berilgandi.
Izoh (0)