Ukraina Mustaqil Davlatlar Hamdo‘stligi (MDH) doirasida imzolangan fuqarolik aviatsiyasi va havo maydonidan foydalanish to‘g‘risidagi shartnomalardan chiqdi. Mamlakat prezidenti Vladimir Zelenskiy tegishli farmonni imzoladi, deb yozmoqda “RBK”.
Gap ikkita shartnomadan chiqish haqida ketmoqda. Birinchi shartnoma 1991-yil 25-dekabrda Minskda imzolangan fuqaro aviatsiyasi va havo maydonidan foydalanish to‘g‘risida. Ushbu hujjatga binoan, uni imzolagan davlatlarning havo hududi yagona hisoblanadi. Shuningdek, kelishuv tomonlari aviatsiya va havo kengligidan foydalanish bo‘yicha kengash — Davlatlararo aviatsiya qo‘mitasini (DAQ) tuzgan edi.
Davlatlararo aviatsiya qo‘mitasi (DAQ) 1991-yil dekabr oyida 12 ta davlat tomonidan tuzilgan fuqarolik aviatsiyasi va havo maydonidan foydalanish to‘g‘risidagi davlatlararo bitim asosida tashkil etilgan. Uni Ozarbayjon, Armaniston, Belarus, Gruziya, Qozog‘iston, Qirg‘iziston, Moldova, Rossiya, Tojikiston, Turkmaniston, O‘zbekiston va Ukraina imzolagan. Kengash faoliyatining asosiy yo‘nalishlari — yagona aviatsiya qoidalarini saqlab qolish, aviatsiya texnikasi va uni ishlab chiqarishni sertifikatlashning yagona tizimi, shuningdek, aviatsiya hodisalarini mustaqil tekshirish va fuqarolik aviatsiyasini rivojlantirish bilan bog‘liq masalalarni muvofiqlashtirishdan iborat.
Ukraina prezidenti o‘z farmonida Tashqi ishlar vazirligiga aviatsiya va havo hududidan foydalanish bo‘yicha davlatlararo kengashga Ukrainaning shartnomalardan chiqishi to‘g‘risida xabar berishni buyurdi.
Ukraina MDHga asos solgan davlatlardan biri bo‘lgan, ammo Kiyev MDHning 1993-yilda ishlab chiqilgan nizomini hali tasdiqlamagan. 2014-yil fevral oyida Ukrainada hokimiyat almashganidan so‘ng, mamlakatning yangi rahbariyati MDH doirasidagi shartnomalarni buzish jarayoni boshlaganini e’lon qildi. 2014-yil mart oyida Ukrainaning Milliy xavfsizlik va mudofaa kengashi mamlakatning MDHdagi raislik faoliyatini tugatish to‘g‘risida qaror qabul qildi va Hamdo‘stlikdan chiqish jarayoni boshlanganini e’lon qildi.
2018-yil may oyida Ukraina MDHning ustav organlari ishida ishtirok etishni to‘xtatdi, Hamdo‘stlikning ustav organlaridan mamlakatning barcha vakillari chaqirib olindi. Shundan so‘ng Kiyev assotsiatsiya doirasidagi hamkorlik shartnomalaridan chiqish jarayonini boshladi. 2019-yil yanvar oyida mamlakat tashqi iqtisodiy faoliyat sohasidagi hamkorlik va iqtisodiy ma’lumotlarning davlatlararo almashinuvi to‘g‘risidagi bitimlardagi ishtirokini to‘xtatdi.
2020-yil avgustda Ukraina MDHga a’zo davlatlar o‘rtasidagi chegara qo‘shinlarining ilmiy-tadqiqot faoliyati sohasida hamkorlik qilish to‘g‘risidagi bitimdan chiqdi. Bunga Kiyevning chegara qo‘shinlar qo‘mondonlari kengashida kuzatuvchi sifatida qatnashgani va MDH davlatlarining chegara sohasidagi hamkorligiga oid bir qator shartnomalarni ratifikatsiya qilmagani sabab bo‘ldi.
Izoh (0)