Yaponiyaga yil boshida Pfizer va BioNTech preparatlari cheklangan miqdorda yetkazib berilishi sababli mamlakatda keksalarni emlash ortga surilmoqda. Ushbu preparat mamlakatda qo‘llash uchun tasdiqlangan yagona vaksina. Bu haqda Yaponiyada emlash ishlariga mas’ul ma’muriy islohotlar vaziri Taro Konoga tayanib, “Kommersant” xabar berdi.
Yaponiyada emlash kampaniyasi o‘tgan haftada boshlandi va sog‘liqni saqlash xodimlarining dastlabki guruhi vaksina qabul qildi. Vazirning ta’kidlashicha, aprel oyida 65 yoshdan oshgan (taxminan 36 million nafar) kishilarni emlash rejalashtirilgan edi, ammo jarayon sustlashadi. Aprel oyiga qadar vaksina yetkazib berish “nihoyatda cheklangan bo‘ladi”.
“Keksalarni emlashni bosqichma-bosqich boshlaymiz va asta-sekin kengaytiramiz”, — dedi Taro Kono.
Amerikaning Pfizer kompaniyasi va Germaniyaning BioNTech kompaniyasi hamkorlikda ishlab chiqargan vaksina hozirgacha Yaponiyada foydalanish uchun tasdiqlangan yagona vaksinadir. 12-fevral kuni mamlakat 386,1 ming dozadan iborat birinchi partiyani qabul qilib oldi, 450 ming dozadan iborat ikkinchi partiya 21-fevral kuni yetkazib berildi. Yaponiya 2021-yil 144 million dozada vaksina olishni rejalashtirgan.
Jons Hopkins universiteti ma’lumotlariga ko‘ra, pandemiya davomida Yaponiyada qariyb 425 ming kishi koronavirus bilan kasallangan. 398,6 ming kishi kasallikdan tuzalgan, 7,5 ming kishi vafot etgan.
Avvalroq shpris yetishmasligi sababli millionlab yaponiyaliklar COVID-19’ga qarshi vaksinasiz qolishi haqida xabar berilgandi. Xabarga ko‘ra, Pfizer vaksinasini olti dozali maxsus flakonda yetkazib beradi. Lekin flakondan oltinchi dozani olish uchun Yaponiyada ishlatilayotganidan farqli, maxsus shpris kerak.
Eslatib o‘tamiz, Yaponiyada koronavirus fonida o‘z joniga qasd qilish holatlari o‘n yil ichida birinchi marta ko‘paygan. Natijada Yaponiya bosh vaziri Yosixide Suga mamlakatda yolg‘izlik va yakkalanishga qarshi kurashni boshqaradigan vazir lavozimini joriy etishini ma’lum qilgan.
Izoh (0)