Японияга йил бошида Pfizer ва BioNTech препаратлари чекланган миқдорда етказиб берилиши сабабли мамлакатда кексаларни эмлаш ортга сурилмоқда. Ушбу препарат мамлакатда қўллаш учун тасдиқланган ягона вакцина. Бу ҳақда Японияда эмлаш ишларига масъул маъмурий ислоҳотлар вазири Таро Конога таяниб, «Коммерсантъ» хабар берди.
Японияда эмлаш кампанияси ўтган ҳафтада бошланди ва соғлиқни сақлаш ходимларининг дастлабки гуруҳи вакцина қабул қилди. Вазирнинг таъкидлашича, апрель ойида 65 ёшдан ошган (тахминан 36 миллион нафар) кишиларни эмлаш режалаштирилган эди, аммо жараён сустлашади. Апрель ойига қадар вакцина етказиб бериш «ниҳоятда чекланган бўлади».
«Кексаларни эмлашни босқичма-босқич бошлаймиз ва аста-секин кенгайтирамиз», — деди Таро Коно.
Американинг Pfizer компанияси ва Германиянинг BioNTech компанияси ҳамкорликда ишлаб чиқарган вакцина ҳозиргача Японияда фойдаланиш учун тасдиқланган ягона вакцинадир. 12 февраль куни мамлакат 386,1 минг дозадан иборат биринчи партияни қабул қилиб олди, 450 минг дозадан иборат иккинчи партия 21 февраль куни етказиб берилди. Япония 2021 йил 144 миллион дозада вакцина олишни режалаштирган.
Жонс Ҳопкинс университети маълумотларига кўра, пандемия давомида Японияда қарийб 425 минг киши коронавирус билан касалланган. 398,6 минг киши касалликдан тузалган, 7,5 минг киши вафот этган.
Аввалроқ шприс етишмаслиги сабабли миллионлаб японияликлар COVID-19’га қарши вакцинасиз қолиши ҳақида хабар берилганди. Хабарга кўра, Pfizer вакцинасини олти дозали махсус флаконда етказиб беради. Лекин флакондан олтинчи дозани олиш учун Японияда ишлатилаётганидан фарқли, махсус шприс керак.
Эслатиб ўтамиз, Японияда коронавирус фонида ўз жонига қасд қилиш ҳолатлари ўн йил ичида биринчи марта кўпайган. Натижада Япония бош вазири Ёсихиде Суга мамлакатда ёлғизлик ва яккаланишга қарши курашни бошқарадиган вазир лавозимини жорий этишини маълум қилган.
Изоҳ (0)