Sadir Japarov Qirg‘iziston prezidenti sifatidagi ilk chet el safarini 24—25-fevral kunlari Rossiyaga amalga oshiradi. Bu haqda prezident apparati tashqi siyosat bo‘limi mudiri Doston Dyushekeyev ma’lum qildi, deb yozadi Kloop.
Uning so‘zlariga ko‘ra, Japarov Rossiya prezidenti Vladimir Putin bilan muzokaralar olib borib, ikki tomonlama hamkorlikning bir qator dolzarb masalalarini, shuningdek, samarali hamkorlikni yo‘lga qo‘yish va yanada rivojlantirish istiqbollarini muhokama qiladi.
Shuningdek, Qirg‘iziston prezidenti Rossiya hukumati raisi Mixail Mishustin, Federatsiya kengashi raisi Valentina Matviyenko va Davlat Dumasi raisi Vyacheslav Volodin bilan uchrashishni rejalashtirmoqda.
Bundan tashqari, Japarov Rossiya biznes hamjamiyati, shuningdek, Rossiyadagi vatandoshlari va Rossiyada ta’lim olayotgan qirg‘izistonlik talabalar bilan uchrashuvlar o‘tkazadi.
Qirg‘izistonda 10-yanvar kuni bo‘lib o‘tgan muddatidan oldingi prezident saylovlarida g‘olib chiqqach, Sadir Japarov o‘zining ilk xorijiy tashrifini Rossiyaga uyushtirishi haqida bosh vazir o‘rinbosari Ravshan Sobirov mamlakat parlamentidagi nutqida ma’lum qilgan edi.
Fevral o‘rtalarida esa Japarov Rossiyaga tashrif uchun tayyorgarlik doirasida o‘z-o‘zini yakkalash rejimiga o‘tgani xabar berildi.
Izoh (0)