O‘zbekistondagi mahallalar, tuman va shaharlar u yerdagi jinoyatchilik holatiga qarab “qizil”, “sariq” va “yashil” ranglarga ajratiladi. Bu haqda ichki ishlar vaziri Po‘lat Bobojonov vazirlik markaziy apparati rahbariyati va viloyat IIB, idora shaxsiy tarkibi hamda profilaktika inspektorlari ishtirokida o‘tkazilgan yig‘ilishda ma’lum qildi, deb xabar beradi “Gazeta.uz”.
Ma’lum qilinishicha, yig‘ilishda fuqarolarning jamoat joylarda xavfsizligini ta’minlash, ijtimoiy xavfli jinoyatlar, shu jumladan, kibermakondagi jinoyatlarni fosh etish bo‘yicha ishlarni takomillashtirish masalalari muhokama qilingan.
Ichki ishlar vazirining ta’kidlashicha, ko‘plab rahbarlar ichki xotirjamlikka berilgan, mahallalarga borib ishlamagan, o‘z vaqtida muammolarni aniqlab, ularga yechim topmagani sabab ayrim mahallalarda jinoyatchilik holatlari ko‘paygan.
“Tartib-intizom, qonunlarga bo‘lgan hurmat, fuqarolarning xotirjamligi, birinchi navbatda, mahallalarda tartibga solingan bo‘lishi kerak”, — deydi Po‘lat Bobojonov.
IIV rahbari Prezident so‘zlaridan iqtibos keltirib, profilaktika inspektorlariga keraksiz ishlar haddan tashqari yuklangani, bu esa ularning asosiy faoliyatini — jinoyatchilikning oldini olishga xalaqit berishini ta’kidlagan.
Shundan kelib chiqib, vazir mahallalardagi faoliyatni yangi tizim bo‘yicha amalga oshirish vazifasini qo‘ygan. Xususan, mahallalar, tumanlar va shaharlar u yerdagi jinoyatchilik holatidan kelib chiqib uch toifaga ajratiladi — “qizil”, “sariq” va “yashil”. Jinoyat o‘choqlari mahallalarning o‘zida qayd etiladi, ularning paydo bo‘lish omillarini tahlil qilish asosida aniq va maqsadli ishlar olib boriladi.
O‘z navbatida, jinoyatlar ko‘p sodir bo‘ladigan mahallalarga qo‘shimcha profilaktika inspektorlari biriktiriladi, shu yerning o‘zida tezkor, post-partul va yo‘l-patrul xizmati xodimlarini jalb etgan holda ichki ishlar bo‘linmasi shakllantiriladi. Jinoyatchilik holati murakkab bo‘lgan mahallalarga “jinoyat o‘chog‘ini” bartaraf etish uchun kuchlar yo‘naltiriladi.
Bundan tashqari, “temir”, “ayollar” va “yoshlar” daftarlari asosida mahallalar kesimida aniq ma’lumotlar bazasi shakllantirilib, uning yordamida “muammoli har bir shaxs bilan individual ishlar olib boriladi”.
Eslatib o‘tamiz, Prezident Shavkat Mirziyoyev 12-fevral kuni Toshkent shahar IIBBga tashrif buyurgan edi. O‘shanda davlat rahbari “hozir hamma telefonda, ijtimoiy tarmoqlarda ekanligi, odamlarni ichki ishlar bo‘limiga chaqiradigan yoki qog‘ozdagi murojaatini kutib o‘tiradigan zamon o‘tgani”ni ta’kidlagandi.
Izoh (0)