Qorabog‘dagi harbiy harakatlardan keyin Armaniston o‘z armiyasini isloh qilishga kirishdi

2020-yilning kuzida Tog‘li Qorabog‘da Ozarbayjonga qarshi olib borilgan harbiy harakatlardan keyin Armaniston o‘z armiyasini isloh qilishni boshladi. Bu haqda mamlakat mudofaa vaziri Vagarshak Arutyunyan “RIA Novosti”ga ma’lum qildi.

Uning so‘zlariga ko‘ra, islohotlarda rossiyalik mutaxassislar ham ishtirok etadi. Mamlakat hukumati birinchi navbatda jangovar tarkibiy qismni oshirgan holda jangovar va miqdoriy tarkibni optimallashtirish masalalarini qayta ko‘rib chiqmoqda.

Bundan tashqari, Armaniston qurolli kuchlarga yangi majmualarni, qurol-yarog‘ tizimlarini va harbiy texnikani kiritmoqda, ko‘proq ofitserlar, davlat xizmatchilari va shartnomachi harbiy xizmatchilarni yollamoqda. Arutyunyanning so‘zlariga ko‘ra, asosiy urg‘u boshqaruv tizimlari, razvedka, radioelektron kurash, havo hujumiga qarshi mudofaa, raketa qo‘shinlari, artilleriyani rivojlantirish va uchuvchisiz qurilmalarni barpo etishga beriladi.

Uning qo‘shimcha qilishicha, 25—30-yanvar kunlari Armanistonda Rossiya Mudofaa vazirligi delegatsiyasi bo‘lib qaytgan, u Armaniston qurolli kuchlarini isloh qilish va modernizatsiya qilishda yordam bergan. Yakunda harbiy-texnik tarkibiy qismga urg‘u beruvchi qo‘shma tavsiyalar ishlab chiqilgan.

Eslatib o‘tamiz, Tog‘li Qorabog‘dagi nizo 2020-yil sentabrda kuchaydi. 2020-yil 10-noyabr kuni Rossiya, Ozarbayjon va Armaniston Tog‘li Qorabog‘da tinchlik haqida bitim imzoladi. Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi.

Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.

Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.

Yanvar oxirida esa Moskvada mintaqa bo‘yicha uch tomonlama ishchi guruhning birinchi majlisi bo‘lib o‘tdi.