Hafta premyerasi, shubhasiz, yangi tarixiy serial “Mendirman Jaloliddin” namoyishi bo‘ldi. Yakshanba kuni efirga birinchi bor uzatilgan yangi formatdagi serial darhol tomoshabinlar e’tiborini tortdi.
O‘zbek tomoshabinlari azaldan tarixiy filmlarni sevib tomosha qilgani bois birinchi seriya ko‘rilishi bilan muhokamalar boshlanib ketdi. Yosh Jaloliddinning arslon ovlashi bilan boshlanuvchi filmda dramatik va jang sahnalari muvaffaqiyatli olinganini alohida aytish lozim. Film musiqalari yaxshi tanlangan, dekoratsiyalar va qahramonlarning libosi an’anaviy turk tarixiy seriallarini yodga soladi. Bu bejiz emas, chunki serial o‘zbek va turk kinochilarining qo‘shma mahsulotidir.
Loyiha rahbari Saida Mirziyoyeva serial yuzasidan o‘z sahifasida fikrlarini yozib qoldirdi:
“ ...Serial kimgadir yoqishi, kimgadir ma’qul kelmasligi ham tabiiy holat. Biz premyeradan so‘ng fikrlar turli-tuman bo‘lishiga tayyormiz... Masalan, eng ko‘p savol filmda nega bosh rolga turk aktyori taklif etilgani haqida bo‘ldi. Asosiy maqsad serial orqali aktyorlarni tanitish emas, balki taniqli aktyorlar orqali jahonga millatimiz qahramonlarini namoyon qilishdir... Serial to‘qima obrazlar va voqealar bilan boyitildi... ‘Ancha byudjet mablag‘i sovurilibdi’, degan gaplar ham bo‘ldi. Ammo bu ta’na asossiz. Serial to‘liq homiylar ko‘magida ishlandi...”.
Serial voqealari anchagina badiiylashtirilgan. Jaloliddin va Chingizxon karvonsaroyda uchrashuvi, Temur Malik Chingizxon huzuriga elchilikka yuborilishi tarixiy haqiqatga mos emasligi, Chingizxonning xiyla yosh, Temur Malikning esa keksaroq ko‘rinishi, dala harbiy lagerining ko‘lami kichik ko‘ringani blogerlar nazaridan chetda qolmadi. Eng qizig‘i esa xorazmliklarni turklar, mo‘g‘ullarni esa o‘zbeklar ijro etganidir.
* * *
Bu hafta Shavkat Mirziyoyev Namangan viloyatida bo‘ldi. Tashrifni Yangiqo‘rg‘on tumanidan boshlagan prezident 3 million dollarlik sarmoyaga barpo etilgan intensiv bog‘ni ko‘zdan kechirdi. Sanoat zonalari va korxonalarni ko‘rdi, jurnalistlar va nuroniylar bilan muloqot qildi.
Tashrif davomida yangi kutubxonani ko‘rish uchun borayotgan prezident korteji kutilmaganda Namanganning chang ko‘chalariga burildi va “Bunyodkor” mahallasida to‘xtadi. Mahalladagi holat havas qilgulik emas. Ichimlik suvi yo‘q, ichki yo‘llar yomon, atrof obodonlashtirilmagan. Mahalla idorasining o‘zi ham xarob, bino orqasida chiqindilar yotibdi. Prezident ana shu mahallani ko‘zdan kechirib rais va uning maslahatchisi bilan gaplashdi, ularni tanqid qildi.
“Sizlar odamlarni uyushtirishingiz, boshqalarga o‘rnak bo‘lishingiz kerak. Shu mahallaning egasi-ku sizlar! Mo‘min-musulmon-ku sizlar! Daraxt eksa bo‘ladimi? Chiqindini tozalatib qo‘ysa bo‘ladimi? Devorni oqlasa bo‘ladimi? Shunga ko‘p narsa kerakmi? Biz mahallaga shuncha e’tibor qaratyapmiz, katta vakolatlar beryapmiz. Bu holatda qanday islohotchi bo‘lasizlar, odamlarni qanday ergashtirasizlar”, – dedi nuragan va oqlanmagan devor oldida turgancha Shavkat Mirziyoyev. Keyin aholi orasiga kirib bordi, odamlarning gaz, elektr energiyasi, ichimlik suvi, yo‘l muammosiga oid shikoyatlarini eshitdi. Bu haqda “Daryo” muxbiri Mirolim Isajonovning batafsil maqolasini o‘qing.
Shundan keyin Namangan viloyati hokimi Shavkatjon Abdurazzoqov prezident tanqid qilgan mahallaga ko‘chib o‘tib muammolarni bartaraf etishga ahd qildi. “Har kuni shu yerda, sizlarga qo‘shni bo‘laman. Uyim mahalla idorasining ro‘parasida joylashadi. Bugun shu yerga konteyner o‘rnatiladi va unga ‘viloyat hokimining uyi‘ deb yozib qo‘yiladi. Bu yerdagi holatni o‘nglab, keyin boshqa holati og‘ir hududga o‘tamiz”, — dedi hokim. Mahallaning nomiga mos bunyodkorlik ishlari boshlanib ketdi. Yuzlab ishchilar jalb etiladigan, axlatxona yopiladigan, mahalla idorasi qayta quriladigan, eng asosiysi, toza ichimlik suvi keltiriladigan bo‘ldi. “Bu yerda 3 gektar joyda kichik sanoat zonasi tashkil etamiz va kamida 10 ta korxona ochamiz. Buning ortidan 12 ming kishi yashaydigan mahallada 1000 nafar odam ishli bo‘ladi”, — dedi viloyat hokimi.
Mavzuga oid:
Shavkat Mirziyoyev Namangan viloyatiga tashrifi davomida Namangan shahidagi “Ishga marhamat” monomarkazida birinchi marta jurnalistlar bilan to‘g‘ridan to‘g‘ri muloqot qildi. Bunday noyob holatda jurnalistlar prezidentga savol berishga oshiqdi. “Kun.uz” muxbirining “Barcha tadbirlarda, viloyatlarga tashriflarda katta-katta islohotlar mo‘ljallanadi, yangi rejalar tuziladi. Fikringizcha, mana shu islohotlar xalqimizni rozi qiladigan, sizning ko‘nglingiz to‘ladigan darajada amalga oshishiga nimalar to‘sqinlik qilyapti?” degan savoliga javoban uchta dolzarb muammoni aytdi. Bu muammolarning birinchisi kadrlar masalasi, ikkinchisi korrupsiya illati va uchinchisi ko‘plab davlat idoralari rahbarlarining saviyasi, bilimi bugungi zamon talabida emasligi bilan bog‘liq, deb hisoblaydi prezident.
Prezident, shuningdek, “...Ommaviy axborot vositalarini to‘rtinchi hokimiyat deymiz, aslida birinchi hokimiyat”, “...O‘zim ham amaldorlarga ‘Jurnalist va blogerlar bilan do‘st bo‘lib, birgalikda kamchiliklarni to‘ldiringlar, muammolarga yechim topinglar. Kim ularga do‘st bo‘lsa, men ham o‘sha rahbarni o‘zimga do‘st deb bilaman’, degan gapni ko‘p takrorlayman. Sizlar hamisha islohotlarimizga adolatli va tahliliy baho berishda davom etishlaringizni istaymiz. Hech narsadan qo‘rqmanglar, ortlaringizda Prezident turibdi”, deb aytdi.
* * *
Xo‘sh, koronavirus vaksinasi atrofida nima gaplar? Ushbu satrlarni o‘qiyotgan o‘quvchimizning tanishlari orasida koronavirusga qarshi emlangan yurtdoshlarimiz uchrash-uchramasligiga qarab ish sur’atini baholasak bo‘ladi. Koronavirusga qarshi kurashish shtabi a’zosi Nurmat Otabekov 17-fevral kuni AOKAda o‘tkazilgan brifingda O‘zbekistonda COVID-19 ga qarshi emlash boshlangach, bir kunda bitta punktda 70 kishi vaksina oladi.
Yana bir yangilik shuki, O‘zbekiston Xitoyning Zhifei Longcom Biopharmaceutical kompaniyasi tomonidan yaratilgan ZF 2001 vaksinasining hammuallifi sifatida tan olindi. Hozirgacha O‘zbekistonda 6,8 mingdan ortiq odam birinchi doza bilan, 2,8 mingdan ortiq kishi esa ikkinchi doza bilan emlandi.
Milliarder Alisher Usmonov O‘zbekiston xarid qilayotgan 1 million vaksinadan teng yarmini o‘z hisobidan olib berishini aytgan. U yana birinchi 50 mingtasini namanganliklarga berilishini so‘ragan.
Koronavirus pandemiyasi boshidanoq mamlakatda eng asosiy shaxslardan biriga aylangan Nurmat Otabekov kimlar birinchi bo‘lib emlanishini sanab o‘tdi. Qizig‘i shundaki, virus yuqtirish xatari yuqori bo‘lgan 65 yoshdan kattalar, tibbiyot xodimlari, surunkali kasali borlar, transport xodimlari o‘qituvchi-tarbiyachilar qatorida jurnalistlar va blogerlar ham bor. Qiziq, yosh va sog‘lom blogerlarning shoxi bormi?
Dayjestimiz nihoyasiga yetdi. “Daryo”da qoling. Dunyo va O‘zbekistondagi voqealardan eng birinchi xabardor bo‘ling.
Izoh (0)