Ҳафта премьераси, шубҳасиз, янги тарихий сериал «Мендирман Жалолиддин» намойиши бўлди. Якшанба куни эфирга биринчи бор узатилган янги форматдаги сериал дарҳол томошабинлар эътиборини тортди.
Ўзбек томошабинлари азалдан тарихий фильмларни севиб томоша қилгани боис биринчи серия кўрилиши билан муҳокамалар бошланиб кетди. Ёш Жалолиддиннинг арслон овлаши билан бошланувчи фильмда драматик ва жанг саҳналари муваффақиятли олинганини алоҳида айтиш лозим. Фильм мусиқалари яхши танланган, декорациялар ва қаҳрамонларнинг либоси анъанавий турк тарихий сериалларини ёдга солади. Бу бежиз эмас, чунки сериал ўзбек ва турк киночиларининг қўшма маҳсулотидир.
Лойиҳа раҳбари Саида Мирзиёева сериал юзасидан ўз саҳифасида фикрларини ёзиб қолдирди:
« ...Сериал кимгадир ёқиши, кимгадир маъқул келмаслиги ҳам табиий ҳолат. Биз премьерадан сўнг фикрлар турли-туман бўлишига тайёрмиз... Масалан, энг кўп савол фильмда нега бош ролга турк актёри таклиф этилгани ҳақида бўлди. Асосий мақсад сериал орқали актёрларни танитиш эмас, балки таниқли актёрлар орқали жаҳонга миллатимиз қаҳрамонларини намоён қилишдир... Сериал тўқима образлар ва воқеалар билан бойитилди... ‘Анча бюджет маблағи совурилибди’, деган гаплар ҳам бўлди. Аммо бу таъна асоссиз. Сериал тўлиқ ҳомийлар кўмагида ишланди...».
Сериал воқеалари анчагина бадиийлаштирилган. Жалолиддин ва Чингизхон карвонсаройда учрашуви, Темур Малик Чингизхон ҳузурига элчиликка юборилиши тарихий ҳақиқатга мос эмаслиги, Чингизхоннинг хийла ёш, Темур Маликнинг эса кексароқ кўриниши, дала ҳарбий лагерининг кўлами кичик кўрингани блогерлар назаридан четда қолмади. Энг қизиғи эса хоразмликларни турклар, мўғулларни эса ўзбеклар ижро этганидир.
* * *
Бу ҳафта Шавкат Мирзиёев Наманган вилоятида бўлди. Ташрифни Янгиқўрғон туманидан бошлаган президент 3 миллион долларлик сармояга барпо этилган интенсив боғни кўздан кечирди. Саноат зоналари ва корхоналарни кўрди, журналистлар ва нуронийлар билан мулоқот қилди.
Ташриф давомида янги кутубхонани кўриш учун бораётган президент кортежи кутилмаганда Наманганнинг чанг кўчаларига бурилди ва «Бунёдкор» маҳалласида тўхтади. Маҳалладаги ҳолат ҳавас қилгулик эмас. Ичимлик суви йўқ, ички йўллар ёмон, атроф ободонлаштирилмаган. Маҳалла идорасининг ўзи ҳам хароб, бино орқасида чиқиндилар ётибди. Президент ана шу маҳаллани кўздан кечириб раис ва унинг маслаҳатчиси билан гаплашди, уларни танқид қилди.
«Сизлар одамларни уюштиришингиз, бошқаларга ўрнак бўлишингиз керак. Шу маҳалланинг эгаси-ку сизлар! Мўмин-мусулмон-ку сизлар! Дарахт экса бўладими? Чиқиндини тозалатиб қўйса бўладими? Деворни оқласа бўладими? Шунга кўп нарса керакми? Биз маҳаллага шунча эътибор қаратяпмиз, катта ваколатлар беряпмиз. Бу ҳолатда қандай ислоҳотчи бўласизлар, одамларни қандай эргаштирасизлар», – деди нураган ва оқланмаган девор олдида турганча Шавкат Мирзиёев. Кейин аҳоли орасига кириб борди, одамларнинг газ, электр энергияси, ичимлик суви, йўл муаммосига оид шикоятларини эшитди. Бу ҳақда «Дарё» мухбири Миролим Исажоновнинг батафсил мақоласини ўқинг.
Шундан кейин Наманган вилояти ҳокими Шавкатжон Абдураззоқов президент танқид қилган маҳаллага кўчиб ўтиб муаммоларни бартараф этишга аҳд қилди. «Ҳар куни шу ерда, сизларга қўшни бўламан. Уйим маҳалла идорасининг рўпарасида жойлашади. Бугун шу ерга контейнер ўрнатилади ва унга ‘вилоят ҳокимининг уйи‘ деб ёзиб қўйилади. Бу ердаги ҳолатни ўнглаб, кейин бошқа ҳолати оғир ҳудудга ўтамиз», — деди ҳоким. Маҳалланинг номига мос бунёдкорлик ишлари бошланиб кетди. Юзлаб ишчилар жалб этиладиган, ахлатхона ёпиладиган, маҳалла идораси қайта қуриладиган, энг асосийси, тоза ичимлик суви келтириладиган бўлди. «Бу ерда 3 гектар жойда кичик саноат зонаси ташкил этамиз ва камида 10 та корхона очамиз. Бунинг ортидан 12 минг киши яшайдиган маҳаллада 1000 нафар одам ишли бўлади», — деди вилоят ҳокими.
Мавзуга оид:
Шавкат Мирзиёев Наманган вилоятига ташрифи давомида Наманган шаҳидаги «Ишга марҳамат» мономарказида биринчи марта журналистлар билан тўғридан-тўғри мулоқот қилди. Бундай ноёб ҳолатда журналистлар президентга савол беришга ошиқди. «Kun.uz» мухбирининг «Барча тадбирларда, вилоятларга ташрифларда катта-катта ислоҳотлар мўлжалланади, янги режалар тузилади. Фикрингизча, мана шу ислоҳотлар халқимизни рози қиладиган, сизнинг кўнглингиз тўладиган даражада амалга ошишига нималар тўсқинлик қиляпти?» деган саволига жавобан учта долзарб муаммони айтди. Бу муаммоларнинг биринчиси кадрлар масаласи, иккинчиси коррупция иллати ва учинчиси кўплаб давлат идоралари раҳбарларининг савияси, билими бугунги замон талабида эмаслиги билан боғлиқ, деб ҳисоблайди президент.
Президент, шунингдек, «...Оммавий ахборот воситаларини тўртинчи ҳокимият деймиз, аслида биринчи ҳокимият», «...Ўзим ҳам амалдорларга ‘Журналист ва блогерлар билан дўст бўлиб, биргаликда камчиликларни тўлдиринглар, муаммоларга ечим топинглар. Ким уларга дўст бўлса, мен ҳам ўша раҳбарни ўзимга дўст деб биламан’, деган гапни кўп такрорлайман. Сизлар ҳамиша ислоҳотларимизга адолатли ва таҳлилий баҳо беришда давом этишларингизни истаймиз. Ҳеч нарсадан қўрқманглар, ортларингизда Президент турибди», деб айтди.
* * *
Хўш, коронавирус вакцинаси атрофида нима гаплар? Ушбу сатрларни ўқиётган ўқувчимизнинг танишлари орасида коронавирусга қарши эмланган юртдошларимиз учраш-учрамаслигига қараб иш суръатини баҳоласак бўлади. Коронавирусга қарши курашиш штаби аъзоси Нурмат Отабеков 17 февраль куни АОКАда ўтказилган брифингда Ўзбекистонда COVID-19 га қарши эмлаш бошлангач, бир кунда битта пунктда 70 киши вакцина олади.
Яна бир янгилик шуки, Ўзбекистон Хитойнинг Zhifei Longcom Biopharmaceutical компанияси томонидан яратилган ZF 2001 вакцинасининг ҳаммуаллифи сифатида тан олинди. Ҳозиргача Ўзбекистонда 6,8 мингдан ортиқ одам биринчи доза билан, 2,8 мингдан ортиқ киши эса иккинчи доза билан эмланди.
Миллиардер Алишер Усмонов Ўзбекистон харид қилаётган 1 миллион вакцинадан тенг ярмини ўз ҳисобидан олиб беришини айтган. У яна биринчи 50 мингтасини наманганликларга берилишини сўраган.
Коронавирус пандемияси бошиданоқ мамлакатда энг асосий шахслардан бирига айланган Нурмат Отабеков кимлар биринчи бўлиб эмланишини санаб ўтди. Қизиғи шундаки, вирус юқтириш хатари юқори бўлган 65 ёшдан катталар, тиббиёт ходимлари, сурункали касали борлар, транспорт ходимлари ўқитувчи-тарбиячилар қаторида журналистлар ва блогерлар ҳам бор. Қизиқ, ёш ва соғлом блогерларнинг шохи борми?
Дайжестимиз ниҳоясига етди. «Дарё»да қолинг. Дунё ва Ўзбекистондаги воқеалардан энг биринчи хабардор бўлинг.
Изоҳ (0)