«Тошкент метрополитени» УК «Ўзбекистон темир йўллари» АЖ таркибидан чиқарилади. Бу ҳақда Транспорт вазирлиги томонидан муҳокамага қўйилган «Тошкент шаҳар транспорти соҳасида бошқарув тизимини тубдан такомиллаштириш тўғрисида»ги Президент қарорида сўз боради.
Қарор лойиҳасида, шунингдек, Транспорт вазирлиги Тошкент шаҳар транспорт бошқармаси негизида Тошкент шаҳар транспорт бош бошқармасини ташкил этиш белгиланган.
Ҳужжат билан Транспорт вазирлиги, Тошкент шаҳар ҳокимлиги ва хорижий мутахассисларнинг қуйидаги таклифлари маъқулланган:
- жамоат транспорти йўналишлари тармоғини уч тоифага - боғловчи, етказиб берувчи ва магистрал йўналишларга ажратган ҳолда босқичма-босқич мақбуллаштириш;
- уч тоифадаги — боғловчи, етказиб берувчи ва магистрал йўналишларга табақалаштирилган тарифларни жорий этиш;
- шаҳар жамоат транспорт корхоналарини мақбуллаштирилган йўналишларда ҳақиқий бажарилган иш ҳажмларидан келиб чиққан ҳолда молиялаштириш (Pool system) тизимини жорий этиш. Бунда Pool system тизими орқали шаҳар жамоат транспорти корхоналарини молиялаштириш манбалари этиб маҳаллий бюджет субсидиялари ва Тошкент шаҳар транспортини ривожлантириш жамғармаси маблағларини белгилаш.
Маълумот учун, «Тошкент метрополитени» биринчи бор «Ўзбекистон темир йўллари» АЖ таркибига 1997 йил кирган бўлиб, 24 йил давомида унинг назорати остида ишлаган.
Аввалроқ «Тошкент метрополитени» янги метро станциялари нима сабабдан номланмаётгани борасидаги танқидларга жавоб қайтарган эди.
Изоҳ (0)