«Дарё» таҳририятига Самарқанд туманининг «Бўзи» маҳалласида яшовчи фуқаролар мурожаат қилиб, «Шиша» қабристонидаги дарахтлар маҳалла раиси бошчилигида кесиб олинаётганини маълум қилди.
Мазкур мурожаат асосида «Дарё» мухбири Фарҳод Норбўтаев журналистик суриштирув олиб борди.
Ҳолат юзасидан дастлаб «Бўзи» маҳалласи раиси Алишер Тўрақулов билан суҳбатлашдик. Раиснинг таъкидлашича, у қабристон ичидаги қуриган дарахтлар шохи синиб, қабр тошлари устига тушаётгани сабаб маҳалла оқсоқоллари билан маслаҳатлашиб, дарахтларни кесиб олиб, ўрнига манзарали дарахтлар, хусусан, арча экишни режалаштирган.
«Дарахтларни кесишдан аввал қишлоқдаги оқсоқоллар билан маслаҳатлашдик. Бу дарахтларни олиб, ўрнига арча экмоқчи эдик», — деди Алишер Тўрақулов.
Айтилишича, 2021 йилнинг 3 февраль куни «Бўзи» МФЙ раиси Самарқанд туман экология ва атроф-муҳитни муҳофаза қилиш бўлимига қабристон ичидаги дарахтларни кесиш учун рухсат беришини сўраб хат ёзган. 4 февраль куни эса 7 нафар маҳалла фаоли иштирокида қабристондаги дарахтларни кесиш бўйича далолатнома тузилган.
Ўрганиш жараёнида дарахтлар бор-йўғи 4-5 та қабр устига тушиб тургани, қабрлардан узоқда бўлган дарахтлар ҳам кесиб ташланганига гувоҳ бўлдик. Бу ҳолатга эса маҳалла раиси жой кам қолгани, шунинг учун янги жой очиб қўйиш мақсадида дарахтларни кесганини билдирди.
«Қабристонда жой кам қолган. Шунинг учун бу ерни очиш мақсадида дарахтларни оқсоқоллар билан бўлган йиғилишда далолатнома қилиб, кесдик», — деди МФЙ раиси Алишер Тўрақулов.
Самарқанд вилоят экология ва атроф-муҳитни муҳофаза қилиш бошқармаси ахборот хизмати раҳбари Шерали Искандаровнинг маълум қилишича, «Бўзи» маҳалласида яшовчи фуқаролар бошқармага ҳам мурожаат қилган. Мурожаат воқеа жойига бориб ўрганилганда ҳақиқатан ҳам «Шиша» қабристонидаги дарахтлар кесилаётгани аниқланган.
«Биз ҳолатни ўрганиш учун келганимизда қабристондаги дарахтлар кесилаётган эди. Келиб, дарахт кесиш жараёнини тўхтатдик. Ўрганиш ишлари жараёнида фақат терак дарахтлари эмас, тол ва мевали дарахтлар ҳам кесилганига гувоҳ бўлдик. Ҳозир ўрганиш ва суриштирув ишлари олиб борилмоқда. Ўрганишлар якуни бўйича батафсил маълумот берамиз», — деди Шерали Искандаров.
Қабристондаги дарахтларнинг кесилишига қарши чиққан фуқароларнинг таъкидлашича, маҳалла раиси экологиядан рухсат олганини айтиб, уларни кесишга ўзи бош-қош бўлган. Шерали Искандаровнинг маълум қилишича, маҳалла раиси ҳеч қандай рухсат олмасдан дарахтларни кесган.
«Маҳалла раиси дарахтларни кесиш учун ҳеч қандай рухсатнома олмаган. Биз ҳолатни ўрганишга Самарқанд туман экология ва атроф муҳитни муҳофаза қилиш бўлимининг давлат инспекторлари ва инспекция раҳбари билан биргаликда келдик. Келганимизда маҳалла раиси ва маҳалла фуқаролари ҳам шу ерда эди. Раис бизга экологиядан рухсат олганини айтди. Ваҳоланки, туман экология бўлими бошлиғи ўзини таништириб, ҳеч қандай рухсат сўраб хат келмаганини айтганидан сўнг унинг важи ўтмай қолди. Бир-икки кундан сўнг маҳалла раиси эски сана билан дарахтларни кесишга рухсат беришни сўраб хат қилиб, туман инспекциясига мурожаат қилган. Биз хатга қонуний жавоб ёздик. Аммо бу важлар ўтмайди», — деди Шерали Искандаров.
Мутахассиснинг таъкидлашича, агар дарахтлар қабристон ёки бошқа жойда плантация шаклида экилиб, ёғоч қилиш мақсадида экилган бўлса, уни кесган фуқарога жарима қўлланилмайди. Табиий ҳолатда чиққан ёки ҳудудга кўрк бериш мақсадида экилган дарахтларни кесиш тақиқланади.
«Президентимиз Шавкат Мирзиёевнинг жорий йил 3 февралдаги фармони билан республикада давлат ўрмон фондига кирмайдиган дарахт ва буталарнинг қимматбаҳо навлари кесилишига жорий этилган мораторийнинг амал қилиш муддати 2021 йилнинг 31 декабргача узайтирилди. Бу ҳақда барча ОАВларда эълон қилинди. Шундай фармон эълон қилиниб турган бир вақтда маҳалла раиси жараённи кўра била туриб, қўрқмасдан, дарахт кесмоқда. Бугун халқимизга мурожаат қилмоқчиманки, ҳурматли фуқаролар, Самарқанд вилоятининг меҳмонлари, ҳар қандай ҳолатда бугун табиатимизни кўз қорачиғимиздек асрайлик. Дарахтларнинг кесилишига йўл қўймайлик», — деди Шерали Искандаров.
«Дарё» воқеалар ривожини кузатишда давом этади.
Изоҳ (0)