Samarqand viloyatining Pastdarg‘om tumanida 44 yoshli kishi poyezdi urib ketishi oqibatida voqea joyida halok bo‘ldi. Bu haqda Samarqandning STV telekanali xabar berdi.
Marhumning jasadi 14-fevral kuni soat 22:40 da Pastdarg‘om viloyatidagi Juma temiryo‘l bekati yaqinida topilgan. Bosh prokuratura matbuot xizmatining ma’lum qilishicha, 1977-yilda tug‘ilgan S.S. temiryo‘lni belgilanmagan joyidan kesib o‘tayotganida o‘z ehtiyotsizligi tufayli Toshkent—Samarqand—Buxoro yo‘nalishida qatnovchi “Sharq” yo‘lovchi poyezdi urib ketishi oqibatida bel, qo‘l va oyoq qismlaridan tan jarohati olib voqea joyida vafot etgan.
Avvalroq Toshkentdagi “Yalang‘och” va “Salar” temiryo‘l stansiyalari oralig‘ida o‘z joniga qasd qilishga uringan qiz o‘zini poyezd ostiga tashlagani haqida xabar berilgan edi. Keyinroq qiz o‘z joniga qasd qilish niyatida bo‘lmagani, xavfsizlik qoidalariga rioya qilmagan holda naushnik taqib, temiryo‘l bo‘ylab harakatlangan vaqtda poyezd urib ketgani ma’lum bo‘ldi. Poyezd mashinistining tezkor harakati natijasida qizga u qadar og‘ir bo‘lmagan tan jarohati yetgan.
Izoh (0)