Qashqadaryoda nevarasini urgani uchun o‘qituvchini haqoratlab, unga tarsaki tushirgan ayolga nisbatan sudga da’vo arizasi kiritiladi

Xalq ta’limi vazirligi ijtimoiy tarmoqlarda Qashqadaryodagi maktablarning birida o‘qituvchining o‘quvchini buvisi tomonidan haqoratlangani tasvirlangan videoga munosabat bildirdi.

Xalq ta’limi vazirining Nazorat-huquqiy xizmati tomonidan aniqlanishicha, hodisa 15-fevral kuni Kitob tumani Xalq ta’lim bo‘limiga qarashli 85-umumta’lim maktabida yuz bergan.

“Ma’lum bo‘lishicha, maktabda fan amaliyoti o‘tab, 5-sinfda dars mashg‘ulotlari olib borayotgan Qarshi davlat universitetining tarix fakulteti 4-kurs talabasi Bobonazar Xurramov o‘quvchining tartibsizlikka yo‘l qo‘ygani, uy vazifasini bajarmagani bois tanbeh bergan.

O‘qituvchining sha’ni va qadr-qimmatiga putur yetkazganligi uchun o‘quvchining buvisiga nisbatan Ma’muriy javobgarlik to‘g‘risidagi kodeksning 197 (5)-moddasiga asosan ma’muriy ish qo‘zg‘atish to‘g‘risida ariza kiritilayotganini ma’lum qilamiz”, — deyiladi vazirlik xabarida.

Vazirlik ota-onalarni ular tomondan o‘qituvchilarga qilinayotgan har qanday nojoiz munosabat bolaning ongiga salbiy ta’sir qilib, unda o‘qituvchi va maktabga nisbatan hurmatsizlik hissini yanada avj oldirishini eslatib o‘tgan.

“ ‘Talim to‘g‘risida’gi qonunga binoan O‘zbekistonda ta’limning ustuvorligi ta’minlangan. Sizga bu borada huquqiy maslahat zarur bo‘lgan taqdirda “Ustoz ovozi” virtual inspektoriga yohud hududingizdagi vazirning Nazorat-huquqiy xizmatiga murojaat qilishingiz mumkin. Sha’ningiz va qadr-qimmatingiz poymol bo‘lishiga yo‘l qo‘ymang”, — deyiladi XTV xabarida.

Ma’lumot uchun, “Ta’lim to‘g‘risida”gi qonuning 45-moddasiga asosan o‘qituvchining huquqlari, sha’ni, qadr-qimmati va ishchanlik obro‘si davlat himoyasida. Ma’muriy javobgarlik to‘g‘risidagi kodeksining 197 (5)-moddasiga ko‘ra, hech kim o‘qituvchining xizmat vazifalarini bajarishiga to‘sqinlik qilishga haqli emas.